絲絲講場:彭博回巢CEO冇碇企

著名嘅彭博社創辦人米高‧彭博(Michael Bloomberg)今年起就會卸任紐約市長,外界估計現年七十二歲嘅佢會將全副精力投身公益,點知佢日前決定重掌彭博社,搞到現任CEO多克托羅夫要黯然辭職。

彭博結束十二年紐約市長生涯後,旋即搬去彭博總社五樓嘅新Office,原本諗住每日坐幾個鐘,但近幾個月喺公司嘅時間延長到六、七粒鐘,仲Sit in埋啲會議,甚至插手彭博嘅發展策略,直言彭博社愈來愈刺激有趣,搞到佢「再次同Bloomberg撻着」,又話可見將來有意繼續打理。

多克托羅夫拒做阿二

不過,加入彭博社之前,做過紐約副市長嘅現任CEO多克托羅夫,心情明顯勁Down,佢話彭博返嚟之後愈嚟愈積極,成個工作環境變晒,彭博亦無凡事徵詢佢。

多克托羅夫形容呀Mike(彭博)好似「上帝」,「創造宇宙,制訂十誡,然後消失,如今再次顯靈,萬民自然要順從」。

彭博社前高層、現任時代集團內容總監Norman Pearlstine就踢爆話,多克托羅夫根本唔想再做彭博嘅副手,今次擺明對佢回巢重掌大權感到十分沮喪。

唉,鬼叫彭博有公司88%股權,又不甘寂寞咩!但「上帝」強調自己出過力挽留老友多克托羅夫,無奈畀對方拒絕,又話「好憎名銜」,決定由得CEO一職懸空,直到有適合人選為止,亦唔會改變Bloomberg現行方針。

余絲韻