Market Insight：鋼鐵股冷敲之選

昨日傍晚歐洲央行議息後，出乎意料減息0.1厘，基準利降至0.05厘的紀錄低位，央行存款利率進一步降至負0.2厘，邊際借貸利率亦調低0.1厘至0.3厘。議息結果公布後，歐元應聲急挫，再創14個月新低。

中移（00941）昨日除息，依然保住「紅底股」身份，收100.5元升0.3%，托市的重任落在中石油（00857）及兩隻內險股身上，國壽（02628）及平保（02318）分別升2.8%及1.4%，業績後芬佬反應過敏，插完一浸開始搵到支持的蒙牛（02319），升1.5%收報36.05元，差不多仲有兩蚊先返到業績前水平。

古勝冇點你2014/09/05

萬里長空

全民皆股現象未現

近幾日可見，升浪由中資電訊、內銀及本地地產股帶動，到昨日輪到內險股接力。大孖沙手上籌碼，在唔同板塊之間快速轉換，要捉到每日手影極為困難，但卻可大致看到，他們買貨心態還是極為審慎，只追業績能見度相對較高，過去兩年落後，大市值兼低PE股份。整體市場上的中型股及二三線，炒味全無，甚至部分增長股如汽車及燃氣股，直頭感覺唔到同升市有半點關係，經驗話畀古勝知，個市距離全民皆股仲有好一段距離。

今浪個市到底可以升到去邊？美國金融海嘯及歐債危機之下，一一年開始恒指全年低位一直在上移，假設今年低位在三月21,137點已經確認咗，套用過去幾年，恒指全年高低波幅大約4,600點，以25,700點作為目標應該一啲都唔過分。

再考慮埋今次港股利好因素其實頗全面，過去兩年大幅跑輸歐美市場，下半年明顯見到資金回流新興市場包括中港股市，還有短期被當成無料到、但中長線威力難料的滬港通。最重要是，經過五年大型上落市，指數刻下突破了橫行區高位25,000點，意味唔少蟹貨變成賺錢貨，之後升市阻力會相對低。

斷估重磅股無可能一路升，熱錢或遲或早都會搵其他出路，中期業績最無睇頭，好多人認為是煤炭股，不過近日睇新聞，鋼鐵業及相關股份情況更為嚴峻，反而吸引到在下搵冷門的興趣。

市場押注政府打救

中鋼協數據顯示，內地鋼材需求續疲弱，反映綜合鋼材價格的指數連跌十個月，七月跌至91.88點，按年跌8.56%。有段內地消息，在鋼價創十年新低下，部分產品如三級螺紋鋼、高線等，跌到每斤1.4至1.5元人仔，比街市白菜價仲要賤。而一些大型鋼企，已開始出現經營困難及資金鏈問題，西城鋼鐵廠兩條中板產線停產。

八月中國製造業PMI，無論官方及非官方（即滙豐編制的數據）均差過預期，預視製造業經過一浪的定點刺激政策後，開始後勁不繼。中港股市卻出奇地強勢，完全唔理實體經濟疲態。一句到尾，市場押重注，賭中央要保住7.5% GDP，唔使幾耐會由「微刺激」變「大刺激」，定向降準升級到全面降準。

當然，股市會唔會最終表錯情，要等歷史話畀大家知，但如果政策轉向，經驗告訴我們，經營環境最惡劣、最急需扶持產業，業績差到無朋友如鋼鐵股般，往往比營運得唔錯或中規中矩的，股價有更大爆炸力。

馬鋼（00323）同鞍鋼（00347）業績乏善可陳，馬鋼產品主要同建築相關，房地產投資放緩對銷售影響最大，上半年蝕7.3億元（人仔‧下同），即使唔計存貨撥備3.34億元，淨虧損4.76億，第二季稍好過第一季，但仲要蝕就差過大行估計，固定成本升及鋼材價跌是業績見紅主因，為免多做多蝕，上半年產量865萬噸，都減少1.6%。鞍鋼半年賺5.77億元，跌17.8%，未至於見紅，但同市場預期全年賺13億至14億元，上半年仲未係夠數。

下半年成本可回落

馬鋼畀分析員的指引，主要係原材料鐵礦石跌價之助，七月始賺到錢，加埋會計化妝延長折舊年期，下半年業績會否逆轉？好難講，但至少無上半年咁肉酸。鞍鋼同馬鋼一樣，高管指引都認為下半年成本回落，業績會好番啲。

姑勿論點，除非中央出招刺激樓市及加大基建投資，鋼鐵業產能過剩問題唔容易解決，但博鋼鐵股關鍵係一個「平」字，馬鋼及鞍鋼市帳率0.46倍及0.63倍，距離十年中位數0.97倍及1.23倍有大段距離，即使打個七折，潛在升幅有47%及36%，賭祖國經濟見底或者下半年出招，若無心水又有閒錢可以一試，風險應該唔大。

古勝