Market Insight：領匯變身壯大規模

正路嚟講，數據好到咁，美國加息預期好難唔升溫，但見十年美債息喺數據後彈唔上2.4厘樓上，昨日仲要隊落2.36厘。古勝估計，同近期俄烏及中東政治局勢不穩，以及預期歐洲央行好大機會再推QE，促使環球資金持續流入美債避險，出現加息預期升美債息回落的背馳現象，姑勿論點，美息低企，對港股與港元資產價格應該利大於弊。

期指結算前港股腳軟，恒指跌155點報24,918點，整體大市上升股份546隻，下跌870隻，九月期指日市收24,868點，比指數除息之後24,818點合理價高水50點，過去三日為轉倉高峰期，九月期指一直高水，反映從期指大戶手影，個市唔多似結算後就玩完。

古勝冇點你2014/08/28

萬里長空

不過，基金經理揀股高度側重少數重磅股，整體大市成交又維持六、七百億唔凍又未算熱的水平，經已夠玩死人，昨日N咁多間公司派成績表，留意到部分基金股，好似恒安（01044）、瑞聲（02018）及雅士利（01230），中績唔算好，惟股價未見太大壓力，或者反映市底唔錯的訊號。

恒地現價仲係吸引

恒地（00012）半年純利94.6億元，升22%，撇除公允值變動的基礎盈利，升46%至50.3億元，比大行估計理想，一來「迎海」一、二期售出近93%，套現進度超出預期；其次，期內出售收租物業及「聚賢居」商舖，錄得5.98億元淨收益，也推高核心收益，昨股價升4%收報53.5元，是○八年二月以來新高，恒地借貸比率由去年底17.2%，進一步降至13.6%。

現價市帳率0.7倍，過去十年恒地市帳率介乎0.46至1.55倍之間上落，平均0.86倍，港樓價處新高，明年美息回升幅度估計唔多底下，現水平地產股其實仲係吸引，恒地就算回到歷史平均市帳率，應該唔過分。

主打手機聲樂及天線系統的瑞聲，上半年賺9.8億元（人仔‧下同），跌8.8%，期內總收入跌3%至37.16億元，毛利率由去年同期42.79%收窄到41.17%，公司解釋是客戶產品組合變動影響。另外，上半年人民幣一度貶值，出現匯兌虧損103萬元，去年同期匯兌收益為3,187萬元。

買私人商場機會增

業績倒退，不過第二季毛利率已經由首季40.2%低位有所回升，再者，大家都預備瑞聲的搵真銀期會係下半年，蘋果公司新一代iPhone落單之時，可能是第三季中後至第四季，估計全年賺25.5億元，市盈率約18.3倍，好大可能未來半個月曝光的iPhone有幾渴市，對瑞聲股價表現至為關鍵。

近排領匯（00823）動作多多，五月先出售四個升級條件一般的商場套現12.4億元（港元‧下同），早幾日又將手上彩輝邨及彩霞邨商場連車位、兆麟商場、天平商場及翠林商場標售，就算啱啱同私人發展商以13.8億元買入黃大仙現崇山商場物業，在下對領匯前日經ANZ、滙豐及星展發行十年期債，籌近5億美元，仲係有些少意外，皆因睇番年報，今年到出年三月到期債務大約31億元，莫非真係畀瑞信估中，領匯會進行股份回購？

半年內極可能變身藍籌的領匯，染指私人項目，大行認為同地理上接近黃大仙商場，有一定協同作用有關。

之前幾年，除非好似置富（00778）有阿媽眷顧，房地產基金唔容易傾得成私人商場項目，主要係個人遊搞到商場租金及估值好似海鮮價一樣，賣家情願同炒家傾，貪佢哋出價爽快都唔想賣畀REITs，今日時而世易，個人遊消費見頂，估計專攻商場的REITs會有更多濕平機會。

電力股陰霾漸消散

雖然昨日跌市，但見電力股表現唔錯，華能國際（00902）股價升4%報9.01元；華潤電力（00836）升1%報23.95元；大唐發電（00991）升3%報4.24元；華電國際（01071）收報5.25元，升2%；中國電力（02380）收報3.58元，升2%。板塊氣氛向好，主要係發改委下調上網電價的幅度低於預期。

早前中電聯預計，下半年內地社會用電增長將達6.5%，下調上網電價亦已底定，電力股亦在陸續公布業績，相信圍繞電力股的不明朗因素漸消散，只要煤價續低企，電力股有力再上。在五大當中，曾於上月配股集資的華電，5元邊有得諗，但周內公布中績，唔爭在等埋成績表先行事。

古勝