絲絲講場：馮裕鈞接掌利豐夠淡定
利豐（00494）嘅「百年基業」，已正式由馮國經阿仔馮裕鈞（Spencer）接班，尋日利豐交成績表，由呢位第四代接班人擔大旗，絲絲認為佢比起之前幾次公開場合，表現好咗好多，問答環節大部分時間都由佢負責。
查實佢正式出任行政總裁個位只係六個星期，今次Spencer明顯早有準備，上個月利豐分柝利標（00787）喺港交所（00388）上市，當時Spencer已經坐正，有人問佢升職有乜感想時，佢就話剛剛接棒兩日，要「儲吓感受先」，保證八月公布業績時，再同大家分享。
冀市佔率更上一層樓
只係事隔一個月啫，尋日問佢上任嘅感想，佢好有準備咁話，自己「非常興奮」，因利豐係全球最大採購企業，擁有好團隊、管理層等，但市佔率仍低於5%，所以非常期望更上一層樓。
利豐主席馮國綸對侄仔Spencer都好照顧，講解完業績交波畀新一代接班人Spencer講業務發展時，笑晒口話「Great great pleasure」。會後又話對Spencer上任表現打足100分，大讚Spencer「靚仔過自己」。
余絲韻