作為全球最大嘅主權基金，挪威主權財富基金（GPFG）呢排似乎密密搵真銀，不停投資房地產咁喎。
事關日前佢就好大手筆咁用咗3.43億英鎊（約44.5億港元），喺倫敦市中心Mayfair區，投資咗一個面積有成1.6公頃嘅地產發展項目，依家仲攬住成57.8%嘅業權。其實同一個發展項目仲有另一個地產發展商參與㗎，咪就係Crown囉，佢哋都投入咗3,800萬英鎊，依家就持有6.4%嘅業權。
挪威主權財富基金嘅發言人Thomas Sevang就話，呢個行動屬於佢哋環球投資策略部署，主要集中喺大型城市，仲要專揀核心零售同寫字樓物業作投資。
而呢個有成8,900億美元嘅主權財富基金，上個月就已經組成咗呢個房地產集團，希望加快做物業投資，又希望可以喺未來三年，每年都投資接近100億美元（約780億港元），係咪好有霸氣呢。
唔講你都唔知呀，其實個基金仲持有紐約時代廣場、巴黎香榭麗舍大街等地方嘅物業，一路去到波士頓、三藩市同蘇黎世都有佢哋嘅資產，你話幾勁先。
余絲韻