隨住阿里巴巴喺美國上市嘅日子愈來愈近，公司亦埋首整頓旗下天貓（Tmall）嘅網店。根據《華爾街日報》報道，阿里為咗吸引更多名牌進駐，決心「清理門戶」，將賣名牌水貨、假貨嘅舖頭一一掃走。
之不過，其他未開店嘅名牌好似Gucci、Giorgio Armani、Ralph Lauren就同人唔同命，喺天貓就分別有69間、59間同12間未經佢哋授權嘅經銷店！
研究公司嘅數據發現，多間喺天貓專賣Burberry、Estee Lauder、Clinique嘅網店，今年四月嗰陣仲有幾十間係賣緊水貨，但到咗六月就只剩番官方嘅專賣店，可以睇得出為免得罪呢班大客，亦可以當係一種激勵手段，阿里都有認真做嘢！
報道仲引述消息人士指，阿里已經承諾，一旦呢堆名牌喺天貓開網店，佢勢必將其他賣緊次貨、水貨、假貨嘅網店剔走，仲會加大力度打擊喺淘寶網售賣嘅假貨添。
而阿里亦已經同Coach Inc.、LVMH集團等品牌簽署打擊假貨協議，相信以後大家或者好難再見到「原單」、「次貨」呢啲名字喺天貓出現嚕！
余絲韻