匯海策略：日圓短炒上落
世事難測，正當美國總統奧巴馬上星期四下令向伊拉克反政府部隊空襲，加沙地區未達新一輪停火協議之際，俄羅斯普京又突然向烏克蘭放軟手腳，投資市場的緊張氣氛霎時緩和，避險資產立即要回一回氣。
受上述消息影響，日圓自然最「身受其害」。本周初日圓兌16隻主要貨幣中有14隻下跌，美元兌日圓則高見102.22，企穩10日及20日線。其實道理就好簡單，雖然日本近期數據唔可以話太好，但又未至於差到日本央行（BOJ）以及安倍晉三要迫切地推出新一輪刺激經濟措施。
既然日本貨幣政策難有變動，日圓息口又低無可低，且匯價相對穩定，以其作為套息交易貨幣就最一流，故考慮到上述因素，可以簡單地推論：每逢投資市場無大好/壞事件發生時，日圓下跌的可能性始終比上升為高。
部署方面，筆者繼續執行早前建議在101至103橫行區內短炒美元兌日圓之策略，上周尾段就以三分一資金於101.6買入美元兌日圓，目標重上102.8，跌穿101止蝕。
阿Lam