Market Insight：A股ETF繼續落鑊

中石油（00857）升逾3%為恒指第三大升幅，但內地有報道指，其賣管道計劃很可能擱淺或重大調整，原因是管道屬中游業務，上接國家氣源供應、下接民營燃氣商，兩大關節打通均存公平性嚴重技術問題，簡單的說法：根本唔Work，所以有機會夭折，折衷方法是賣番畀大型國企。

事實上，一來民營資本甚少有足夠財力，二來對政策欠缺信心。結果所謂「混合所有制」至今大部分case只係國企賣畀國企，變成名存實亡。中石油三月開始股價升咗近五成，相信部分原因是炒作出售資產，若計劃擱淺，對市場信心難免有衝擊，但昨日股價未受相關報道影響。

資金向東流好合理

近期炒作題材包括國企改革、房地產鬆綁及滬港通等，前者及後者都有很大幻想空間，至於鬆綁是否等於樓市得救？未來銷售量及售價自有答案。滬港通呢個主題應該不離事前炒作、事後散水，券商股仍然炒唔停，如信達國際（00111）、天行（00993）以及華富（00952）等都升幅逾一成。

古勝冇點你

萬里長空

滬綜指昨再升1.38%，創八個月新高，有統計話外資流入創○八年四月以來新高，而資金來源是發達國家股市。近期歐洲股市的確較差，第三大經濟體意大利技術上陷入衰退，歐盟同俄羅斯互相制裁累鬥累，而中國經濟此時轉好，資金移情別戀並不為奇，泊在中港股市多兩個月，然後再作部署。

滬港通之好處是可直接投資A股，但近期最熱門係兩隻A股ETF──南方A50（02822）同安碩A50（02823），可以解釋為投資者已等唔切滬港通，趁近期內地經濟數據做好而追捧；亦可解讀為投資者偷步，希望在滬港通前先飲頭啖湯，等正式開通就高位出貨。

不過，A股ETF之最大好處係唔使傷腦筋，滬港通等於多咗幾百隻新股，連基金經理也難消化。但當可直接投資A股之後，ETF能否保持3%以上溢價頓成疑問，而買輪雖然槓桿比率高可以小博大，但要再畀多一成以上溢價。如果覺得滬港通揀A股太費精神又嫌ETF溢價過高，較簡單可買內銀股（直接分享經濟增長成果），或買內險股（受惠於股市升幅）。

炒作方程式都啱用

無可否認，A股呢排確氣勢如虹，就算IPO呢個魔咒亦已冇有怕，原因除咗滬港通之外，近月內地經濟數據相當標青，無論PMI、發電量、M2及出口等均反映經濟復甦，周六公布之CPI亦相當溫和，外資大行慣常留下一句評語：為貨幣政策提供寬鬆空間，雖然明知全面寬鬆機會很微，但經濟復甦 + 低通脹 = 股市上升，美國炒呢條方程式已兩三年，現在輪到A股追落後。

如無意外，阿里九月份在美上市，此前一舉一動都受市場關注。消息指最近阿里為咗讓旗下商城能吸引更多名牌進駐，故主動聯絡名牌公司，如在其商城設店，將盡最大努力將商城內售賣的冒牌貨商戶清除。用呢招好拉攏名牌合作有吸引力，既可自抬身價以便在上市時爭取更好估值，又可清理一批專售冒牌產品的商戶，以防為上市審批添變數，都幾有諗頭！

展望下半年，除咗阿里之外，據講南韓的LINE亦計劃期間在美上市，估值超過100億美元，會唔會被阿里飲咗頭啖湯，不得而知，但若然市場冇特別重大不利消息出現，兩家大型科網企業排隊登場，下半年科網股再現炒作熱潮仍值得期待。

翻撻博雅等埋業績

昨日港股升勢，科網股亦有異動，主要係IGG（08002）中績轉盈兼派發中期息所帶動，IGG股價急升29%，而雲遊（00484）及博雅（00434）則分別升5%及10%。能唔能夠成氣候，一切睇住騰訊（00700）呢隻領頭羊，昨日股價曾見133.4元，收報132.3元，升1.93%，公司將於明日宣布中績，若中績公布後股價再破頂，同類股確有望翻撻踩油行一轉。

板塊中，博雅的技術走勢亦不俗，過去兩周先後重上10日及50日線，10日線重上50日線，黃金交叉預視升勢。公司今日將宣布中績，會唔會好似IGG咁有驚喜就要擔定櫈仔等睇戲，都唔爭在等中績揭盅再見機行事。若消息對辦，短炒目標踢上11.5元，支持位9.3元不宜有失。

古勝