孖妹Ｓ檔案：金融精英 投入商界
創業可能係唔少年輕人嘅夢想，希望將興趣變為事業，同時賺取人生第一桶金。但孖妹今次搵嚟兩位頗有年資、由投資界跳到商界嘅金融業人士，參透吓佢哋嘅創業竅門同優勢！
Joshua：地產代理網站OKAY.com總裁兼董事 Joshua Miller
大摩副主席轉戰地產
Kitty： Joshua，你曾經喺知名投行摩根士丹利（Morgan Stanley）擔任副主席，喺香港同紐約全球資本市場及投資銀行部門工作咗八年，點解會忽然間辭職，由紐約返嚟香港撈地產界？
Joshua：因為我想轉去從事企業性質（Entrepreneurial）較重嘅工作，去規模細啲嘅公司做，發展機遇可能會多啲！房地產係一個好大好重要嘅行業，但香港甚至整個亞洲嘅房地產業都唔夠專業，仍然有好大進步空間。我最初係加入由媽媽創立嘅亞太地產（APP），總共做咗八年，直至二○一一年OKAY.com加盟APP後，就由我正式接掌OKAY.com。
彩兒：雖然我未儲夠首期買樓，但都試過搵屋租，嗰時都成個幾月先搵到個心水盤，又想間屋「四正」，又要交通方便！點知未租到屋，就已經多咗一班代理「朋友」！
投行學曉業務分析
Joshua：係呀，依家市面上嘅物業資訊好零碎，代理間嘅競爭令到佢哋未必肯提供中肯意見，買家有時要花費好長時間先可以買到個心水 靚盤。而OKAY.com嘅創辦理念，就係透過科技，提供準確、全面、流通嘅行業資訊，建立值得信賴而且透明度高嘅地產代理網站。網站今年首季同次季收入，就分別按年升咗170%同100%。
Kitty： 網站有「星級地產分析員」、現任Portwood Capital主席卓百德（Peter Churchouse）坐鎮，一定增加唔少說服力！但無番咁上下人脈，都未必請得郁佢。咦，原來Peter當年都喺大摩做過，咁你哋咪即係前同事？
Joshua：雖然我哋以前都喺大摩做嘢，但並唔係同一個部門，所以當時搵佢做顧問時，只係透過相熟嘅人穿針引線，先有機會認識佢。其實我都好懷念以前喺投行工作嘅日子，鍾意嗰度嘅人同文化，亦喺嗰度學識咩叫Marketing同點樣分析一間公司業務，對於我依家嘅工作好有幫助，喺拓展公司業務嘅時候，會識得點樣衡量機遇同風險。
彩兒： 睇嚟你已經習慣咗自僱人士嘅生活喇喎，恭喜晒！
Joshua：我都好享受依家嘅工作，雖然樣樣都需要「一腳踢」，但同團隊一齊由零開始去建立公司嘅感覺，好似經歷一場冒險咁，每日都充滿唔同嘅可能性。要創業，就唔好怕失敗，仲要謙虛學習同聆聽，就算曾經喺投行或大企業做過，都唔代表你最叻，總會有人比你知得多。
Kitty：Joshua，你喺陽光與海灘嘅夏威夷出世，有無諗過退休之後返去歎世界？
Joshua：乜我個樣好老咩？咁快就問退休，哈哈！可能啦！其實我每年都會同屋企人返去一、兩次，我鍾意釣魚。講起夏威夷大家都會諗起Waikiki海灘，但夏威夷仲有好多地方好玩o架。你下次去旅行話我知，等我教你去！
Jane：Jax Coco創辦人兼副主席 Jane Gottschalk
對沖「芬女」自創椰子水
彩兒：Jane，你成日都以「企業家性格」嚟形容自己，點解嘅？
Jane：我自細就跟隨父母到世界各地生活，鍾意追求刺激。我覺得「企業家性格」嘅意思係，肯接受挑戰、承擔風險，正如我當年剛踏入社會工作就揀金融業，成為股票經紀，後來又喺倫敦做咗兩年對沖基金經理。話你知啊，我當時係同事堆中唯一一個「芬女」（女基金經理）嚟o架！
承擔風險 獨到果斷
Kitty：做「芬女」應該都幾適合你o架喎，點解你要走呢？
Jane：我好享受呢份工作，但小朋友年紀仲細，我知道如果想有多啲時間照顧佢哋，我就唔可以繼續做。辭職之後，我一直有幫朋友搞吓生意，點知做吓做吓，就發展埋自己嘅生意，同老公Max，仲有Alex、Jason Ing兩位港商創立椰子水品牌Jax Coco！
彩兒：聽聞Jane你本身都好鍾意飲椰子水，係咪呢個原因激發你要創立自家椰子水品牌？
Jane：相信自己嘅產品先會成功！純椰子水對身體有益，我哋全家都係佢Fans嚟o架！六年前，喺椰子水熱剛開始時，我同老公已經有投資美國品牌Vita Coco。二○一一年我哋一家人嚟到香港，發現原來亞洲市場係無預先包裝好嘅椰子水賣，嗰時我日日都要拎住啲好重嘅新鮮椰青返屋企，亦因為咁，我開始覺得呢壇生意「有得搞」！我當然都有猶豫過啦，因為亞洲人都習慣捧住原隻椰青嚟飲，怕佢哋唔接受。但創業就係咁，你一定要肯承擔風險先有機會成功。而且，曾經作為一位基金經理，我知道有啲時候需要果斷，如果唔係，就「蘇州過後無艇搭」喇！
Kitty：我有次同朋友去餐廳食飯都見到Jax Coco 嘅產品，啲食客好似都幾接受啊！
Jane：純椰子水市場喺亞洲增長迅速，Jax Coco喺二○一二年六月推出，連傳奇音樂人Elton John都係品牌嘅共同擁有人。今年上半年，Jax Coco香港銷售額更按半年大增逾兩倍，公司預計今年全球銷售額將達2,000萬港元。幾個月前，我哋新推出兒童裝椰子水同椰子油；日後會繼續研發更多由椰子製成嘅副產品，例如椰子奶、糖、薯片等。
彩兒：Jax Coco搞得咁有聲有色，你一定好忙喇。呢兩年嘅生活，比起以前嘅「財女」生活，最大分別係咩？
Jane：以前我每朝都要趕返公司開會，睇錯股投資輸錢時，仲會將壞心情帶埋返屋企；但依家嘅返工時間就多啲彈性，我堅持利用每朝六點至九點呢段時間做嘢，有效率好多，又會同愛犬散步或者爬山，藉機幫自己整理思緒兼充電。
Kitty：你啲時間管理得咁好，難怪好似識分身咁，照顧到五個小朋友之餘，又參與捍衞動物權益活動，仲要同時經營三間公司啦！
彩兒 Kitty
若有料報畀彩兒同Kitty或有嘢問，可電郵money.biz@on.cc