市場最新調查指，以出貨量嚟計，今年第二季小米手機喺內地嘅市佔率升到去14%，第一次爬咗三星頭，成為內地智能手機廠商新一哥。
唔知係咪江湖地位提升咗，搞到班小米員工開心過頭，有位小米員工尋日竟然喺微博發文話，同想過檔小米嘅諾基亞朋友傾偈，發現諾基亞薪水高、假期多、工作少，跟住又感嘆小米「沒有這種好職位」，轉個彎想突出小米員工嘅勤奮。
呢個微博一出即有幾千條鬧爆小米囂張嘅回應，大連萬達太子爺王思聰仲炮轟小米係「小人得志」。連阿里巴巴都加入抽水，喺官方微博勁讚諾基亞員工係一班有夢想嘅人，願意為呢班被炒員工提供夢想嘅舞台添！
余絲韻