絲絲講場：39萬同施密特歎咖啡?
又有美國慈善網拍賣名人私人時間嘅活動，呢趟係由一個名為Charitybuzz所搞嘅慈善拍賣，呢次拍賣嘅就係Google執行主席施密特（Eric Schmidt）嘅飲咖啡時間嘞！
吹水半粒鐘 6個人爭
呢次見面地點定咗喺Google嘅紐約寫字樓，時間只係得30分鐘，競投成功嘅人睇怕要做吓功課，諗定問咩。依家暫時就有6個競投者，最高嘅出價係10,500美元（約8.19萬港元）。網站預測呢項拍賣嘅價位可以推高到50,000美元（約39萬港元），而拍賣所得嘅善款就會捐畀一個藝術機構Rush Philanthropic Arts Foundation。
股神午餐價近千七萬
不過，講到拍賣飲咖啡時間，施密特並唔係第一個。好似蘋果公司CEO庫克（Tim Cook）啱啱就喺今年五月用自己嘅時間賣咗19.36萬英鎊，施密特今次嘅拍賣會喺八月十四日完，一齊睇吓佢最終會捐到幾多錢喇。
當然，講到呢種名人拍賣私人會面時間嘅表表者，自然係股神巴菲特啦。佢自二○○○年開始，每年舉行一次慈善拍賣自己嘅午餐時間。今年嘅競投者最終成功用217萬美元（約1,692.6萬港元）買到同佢會面嘅機會。
余絲韻