絲絲講場：張華峰拉大隊上京講股
立法會即將休會，但立法會議員張華峰仍然風塵僕僕，今日（16日）就會率領金融界代表團一行三十幾人，一連三日訪問北京，會見多個部委，包括中證監、發改委、統戰部同港澳辦等。
由於今次代表團有機會見領導人，參加人數踴躍，陣容強勁，而且代表團仲有晒規格。除咗張華峰任團長外，李細燕會任副團長兼秘書長、閻峰任首席副團長、仲有多名副團長包括朱李月華、陳立德、王國安、林德明、鄧聲興等。
傾滬港通人仔兌換上限
今次代表團成員唔單止係經紀，仲包括其他金融界別，好似投資基金公會黃王慈明、「紅籌之父」梁伯韜、銀行界吳亮星同滙豐代表等。
今次訪問嘅議題主要係中港兩地金融發展，「滬港通」近期大熱，肯定係議題之一，有訪問團代表就話，依家兩地喺法律同監管制度都好唔同，隨住中港市場互聯互通，係咪應該有完善嘅空間，從而發展一套共存嘅模式。至於市場引頸以待嘅放寬港人每日兌換人民幣兩萬元上限，亦都係訪問團關心嘅課題。咁又係，「滬港通」逐漸逼近，但放寬兩萬元限制暫時仍未有風聲，難怪業界咁肉緊嘅！
余絲韻