打工仔想博升職加薪，一般都係抱住「騎牛搵馬」嘅心態，睇吓有無機會跳槽上位，但原來呢招喺金融界已經Out左喇！
絲絲近排睇到求職網站eFinancialCareer有個調查，話香港有22%嘅金融專才未搵到新工之前，就已經嗌炒老細魷魚，靠嚇話辭職嚟博升職加薪。睇番新加坡同內地，分別都係得12%同4%嘅金融專才識得用呢招咋。
千祈唔好諗住咁樣「跳草裙舞」係屎橋一條，偏偏就有78%用過呢條蠱惑招嘅受訪者成功食胡，博到升職兼加薪。不過eFinancialCareers亞太區總監Neil Clark就覺得，雖然大部分人可以靠呢招食胡，但佢哋同上司之間嘅信任都會直接受影響，所以唔建議大家以「跳草裙舞」作為談判手段。
但絲絲見到成功率差唔多有80%，都咪話唔心動，各位自問有實力嘅金融才俊真係可以諗諗，值博率極高！
余絲韻