絲絲講場：永隆幫邊青舞出自信
「為咗跳舞，你可以去到幾盡？」唔好以為呢句說話只係適合Hip Hop友講啊，平日唔少斯斯文文嘅Banker其實都好鍾意跳舞o架！好似永隆銀行助理總經理鍾少權（Derek）咁，早前出席由永隆贊助嘅「舞動健康校園」計劃結業禮，見到一班年輕人跳舞跳得咁精彩，搞到自己都想跳埋一份！
將Hip Hop融入校園
「舞動健康校園」計劃唔止淨係跳舞咁簡單，呢個計劃培訓超過100名邊青，成功將Hip Hop融入校園。
喺上星期六嘅結業禮上，一班同學仔上台表演，個個都拍晒手話好精彩。佢哋學跳Hip Hop後唔止變得正面，而且仲好有自信，搞到Derek自己都好慨嘆讀書嗰時無學跳Hip Hop，仲話時光倒流嘅話一定要學。
Derek仲希望邀請今次活動嘅協青社嘻哈學校導師，去永隆教班同事跳舞，等大家Annual Dinner Show吓舞技，實行搞永隆狂舞派啊！
余絲韻