Market Insight：內銀股不利因素多

老實講，習慣睇魚缸日日大起大跌的股民，或者好難理解一個規模達1.39萬億元市值的基金，要爭取高回報無想像中咁容易。一來基金size大成咁，就算有個別投資跑出，最後同其他大部分平平穩穩投資項目一齊計數，最終溝到淡晒，而且大型主權基金有時根本唔會考慮市值太細的公司，以免浪費人力物力。

今次年報，淡馬錫披露年內加注工行（01398），持股量去到H股的8.9%，也是建行（00939）、中行（03988）的主要投資者，令整體在中國投資比重，由一年前23%升至25%，僅次於新加坡本土的31%。

淡馬錫純追求穩陣

揸到咁多，淡馬錫好睇好內銀？其實又唔可以咁講，由亞洲區外交角度去睇，或者價值投資取態，淡馬錫都無理由唔買內銀股。

古勝冇點你

萬里長空

以昨日收市價計，「工建中」三行市值在全球上市企業排名榜位列19、31及60位，亦係頭60位中估值最平股票，預期市盈率5倍、4.5倍及4.4倍，只要有8至10%增長，6至7厘股息回報，一間手上銀彈過萬億搵嘢嚟買的基金，實在無乜理由唔揀內銀股。當然，要刀仔鋸大樹或者諗住炒股票博首期的小股民，內銀肯定唔係你杯茶。

自一○年開始，內銀股由增長股變成周期股，主要係炒家用嚟賭國策轉角。舉個例，好似去年底內銀股價陰陰落，一來投資者驚唔知今年第二季，私企債進入違約高峰期有幾大鑊，同埋銀行搶生意，高息推理財產品可能損害息差。直到三月中，內地樓市見頂，阿爺默許之下部分地方政府當限購令無到，人行也開始出手推「定向降準」，全國性降低存款準備金率之日，似乎不遠矣，氣氛使然之下，內銀股又炒番轉頭。

四年來，工行股價主要在4至6元之間上落，現價4.95元，回到上落區的中游水平。依家市場擔心利率市場化殺到埋身，中銀監要求銀行將表外信貸回歸表內，加上明年初又係信託貸款到期高峰，樓市下滑銀行呆壞帳可能進入上升周期。

綠藥天鴿算有交代

未來兩季，短期內銀不利消息唔少，單靠平夠唔夠支持入市？古勝唔係淡馬錫，興趣唔大，掉番轉頭諗，如果內銀好世界，其他中資股隨時升得仲多。

俗語話「十個牛皮九個淡」，大市衝上23,500點之後唔上唔落，昨日終於藉美股回吐狠狠懲戒好友，恒指大跌365點，收報23,176點。跌市下，主板成交升至640億元，沽空佔成交比例縮到8.48%，50隻藍籌股得百麗國際（01880）、蒙牛（02319）、昆侖能源（00135）及中遠太平洋（01199）錄得升幅。整體大市下跌股份1,012隻，比上升股份384隻多2.6倍，跌得相當全面。

跌市下，反而三隻掛牌新股表現唔錯，綠葉製藥（02186）收報6.7元，比招股價5.92元高13.2%，天鴿互動（01980）收5.72元，高過招股價5.28元約8.3%。由利豐（00494）一送一以介紹形式上市的利標（00787），即市高低位2.21元及1.75元，收報1.8元，以利豐除淨前後股價由11.66元碌落昨日10.1元計，乜都唔理的小股民，暫時都唔見有乜太大輸蝕。

昨日古勝提過的兩隻本地電訊股，和電香港（00215）大成交破位，再升6.5%，數碼通（00315）升1.7%，似乎在下之外，唔少人都預期電話費短期有加無減。

周大福料跌幅有限

另外，翠華控股（01314）遭股東配股減持，上牌價3.41元，股價跌9.7%收報3.35元，接貨者即吃眼前虧。麥格理憂慮翠華較高的營運開支，以及內地分店的同店銷售未達預期水平，將今明兩年盈利調低17%及21%，目標價由5.2元降至3元。

收市後，周大福（01929）公布截至六月底止首季同店銷售，按年急挫四成，其中內地跌兩成八，港澳及其他亞洲地區跌五成，今年「五一」黃金周香港的珠寶零售銷售之疲弱，已見到中央反貪，對內地大款來港消費的影響。

該股個多月時間由低位反彈近一成九，調整在所難免，但相信周大福股價跌幅有限，返到五月中10元水平機會唔大。

古勝