華爾街大佬之一、摩根大通行政總裁戴蒙宣布證實患上咽喉癌！
現年58歲嘅戴蒙，揀喺自己加盟摩通十周年之日，向公司上下發通告，坦承喉嚨同隔籬嘅右頸淋巴核度生咗個腫瘤，夏天要放假接受八個星期嘅放射加化療，呢段期間仍會積極參與公司事務，不過嚟緊拜會希臘同意大利總理嘅歐洲五國商務之旅，就要臨時取消囉。
摩通發言人埃萬傑利斯蒂就話，暫時冇特定邊個會喺戴蒙就醫期間代行佢嘅職務，最大問題都係見客，但各部門主管工作一切如常，董事局亦定好咗可以即時，或者三五七年後接替戴蒙嘅計劃。
之前就有人傳過戴蒙嘅潛在接班人，包括資產管理部主管埃爾德什（Mary Erdoes）、企業及投行部主管平托（Daniel Pinto）、商業銀行部主管佩特諾（Doug Petno）、同埋財務總監萊克（Marianne Lake）。
負責醫戴蒙嘅斯隆基達寧癌症中心指，生喺頭同頸嘅Cancer如果及早發現，多數都醫得番，而戴蒙亦提到，個瘤已限定喺一個範圍，冇擴散迹象，所以佢對病情都好樂觀。
無巧不成書，同戴蒙老友鬼鬼嘅比西尼亞諾幾年前仲係摩通高層嗰陣亦都患上咽喉癌，依家就做咗電子支付平台First Data行政總裁。
但絲絲相信，戴蒙離開摩通後應該「疊水」過佢，事關「股神」巴菲特話過，畀着佢請戴蒙，出手一定重過摩通嘛。
余絲韻