上半年完結後，內地基金公司埋單計數，結果由舊年攞第一嘅中郵戰略新興產業基金，冧莊以39.42%嘅收益率，繼續排喺股票型基金榜首。
雖然隻基金嘅渣Fit人任澤松，只係個唔夠30歲嘅80後，不過佢新任基金「一哥」個朵呢排勁響，有路邊社消息話，淨係最近短短三個工作日，佢打骰隻基金已經吸引咗近10億人仔嘅申購量，簡直畀班散戶當神咁拜。
呢位新進基金「一哥」，其實係做審計出身，轉行做基金經理只係年半左右。佢喺一二年十二月先擔正，成為中郵戰略新興產業基金嘅基金經理，舊年隻Fund就以80.38%嘅漲幅勇奪年度冠軍，令到好多人大跌眼鏡。今年上半年，佢渣嗰Fit隻Fund繼續跑出，39.42%嘅收益率，足足拋離第二位接近15個百分點。
「一哥」揸重貨嘅股票，差唔多清一色係創業板股票，表現得最好嘅一隻，上半年升咗一倍有多，表現得差啲嘅重倉股都升咗一成四，絕對跑贏大市。
雖然都有業界批評「一哥」風格過於激進，好容易會大浪翻船，不過，對於小投資者來講，賺到錢最實際，隻中郵戰略新興產業基金喺暫停幾個月之後，最近重新開放申購，短短幾日就吸金近10億元人民幣，已經充分反映咗「一哥」嘅魅力啦。
余絲韻