Market Insight:騰訊有勢挑戰高位

恒指在22,800至23,300點悶足個幾月,估唔到一踏入七月就已經打破僵局。恒指昨勁升358點收報23,549點,全日68隻熊證被強制收回,51隻屬於恒指熊證,主板成交733億元,是滬港通消息公布後最高紀錄,上升及下跌股票分別為987隻及435隻。

港股昨日在成交配合外,從技術走勢看,恒指升穿了六月高位23,397點以及年初高23,469點,下一站阻力會係去年下半年高位24,111點。

昨日到底個市因乜事升?內地六月製造業PMI做好,中央「微刺激」政策見成效,古勝認為,最多係基金經理信心增強的理由,講到尾,市升需要新錢流入。金管局入市干預港匯消息,肯定幫到唔少。金管局為防港匯升穿7.75,五度入市,令場邊基金經理,不得不擱下等運到心態去追貨。

港股發圍有迹可尋

本文提過,近月港匯離奇咁強勢,自三月見7.768低位,一直走強,整個六月份港匯大部分時間企住金管局強方兌換保證加50點子內,即7.7500至7.7550之間,匯價顯示資金持續流入港元區,成個六月港股牛牛皮皮,先係X檔案一樣難以解釋。

人行昨日荒死匯商唔繼續衝擊港元,人行國際司副司長朱隽在記者會上指,香港將來用唔用聯繫匯率,人行尊重香港自己的選擇。

講係咁講,邊有人信阿爺畀香港人決定自己用唔用聯繫匯率,但說法肯定惹炒家繼續盯住港匯,在港元區游資充裕底下,或者今次港股可以再行多幾步,話唔定趁滬港通開車前,有機會升到24,000點甚至25,000點水平。

基金掃貨冇咁短癮

上升股票接近一千隻,連滿布霉菌的鋼鐵股,例如馬鋼(00323)及鞍鋼股份(00347)都挾高6.2%及5.8%,可見最緊要落後的道理,基金經理也無視澳門六月博彩收入下滑,銀娛(00027)及金沙中國(01928)分別升4.8%及2.9%,資金選擇有咁落後得咁落後,反而上半年跑贏個市的燃氣股同石油股偏軟,基金沽獲利貨,換入underweight股票的手法明顯。由於今次升市有足夠成交配合,可以相信,應該唔會太短癮也。

個市破位,魚缸客久旱逢甘露,實情外圍強咗一段時間,隔晚華爾街三大指數中,道指、標普500指數都以歷史高位收市,美國個市有幾癲?舉個例子,五月下旬至上市的京東商城(JD.com),以19美元上市價,隔晚收報29.69美元,累積升56%。早幾日上市的運動攝錄機GoPro,以24美元上市,隔晚收48.8美元,升103%,網絡及科技股炒風有幾瘋狂,大可感受一二。

昨日京東啱啱過上市blackout期,瑞銀同美銀即刻幫佢出報告,基於累積升幅唔細,都只係夠膽畀京東中性評級,瑞銀目標睇30美元,美銀睇31美元,計落依家個價,京東市值約385億美元,騰訊控股(00700)揸住京東14.3%股權,當日入股的2.14億美元,轉眼間升值到55億美元,相當於帳面賺412億港元。馬化騰點石成金的威力,又添一例證。

五月時京東上市前夕,正值美國科網股調整,納指由4,371點水平,突然輾轉向下跌穿4,000點關口,當時進行路演及招股的京東,成功集資20億美元不特止,同期第二季,去美國上市的中國企業總共向投資者伸手集資35億美元,是○七年第四季之後的最高紀錄。反觀中港股市同期死氣沉沉,不禁會問,莫非外國月光特別圓?去美國上市的中國公司特別值錢。

睇實阿里上市消息

成個魚缸都萬眾期待緊,傳聞八月八日赴美上市的阿里巴巴,以中國企業在美國集資額破紀錄的姿態強勢登場,掀動中國網絡股估值水漲船高。喺利好憧憬影響下,昨日騰訊股價炒上拆細後新高。

古勝昨日亦提過,阿里招股前騰訊應可以保持強勢,但要留意風險,以昨收市價122.8元,或者拆細前614元,騰訊一四年市盈率39.8倍,比五年平均估值29.4倍高出超過三分之一,以未來兩年業績複合年增長大約36%,PEG已高於1倍的認可接受範圍,若然追入博短期挑戰129.2元高位,記住上咗車後,最緊要睇實阿里上市的消息趁好消息落車。

古勝