美麗華酒店（00071）尋日舉行股東會，亦係人稱四叔嘅李兆基最後一次以美麗華主席身份主持股東會。四叔自言今年已經八十幾歲（資料顯示係八十五），如果喺政府度做嘢，六十幾歲已經退得休，依家已經係「超時」工作咁話。佢又話自己年紀大，要多啲時間休息，所以會盡量減少啲工作，「重要嗰啲唔減住，普普通通嗰啲就減啦！」
四叔冇再講邊啲係重要，邊啲係普普通通，絲絲估，旗艦公司恒基地產（00012）係重要嗰啲，既然唔做美麗華主席，就可以理解為普普通通囉。
將會接任做美麗華主席嘅二仔李家誠（Martin）就話，雖然四叔唔做主席，不過仍然喺董事局入面，而佢自已喺○四年已經加入董事局，都好清楚內部運作，相信公司唔會有改變。
對於依家不斷有聲音話削減內地個人遊數量，Martin個人就唔多贊成，不過就話內地個人遊旅客佔佢哋酒店整體客人大約30%，相信影響有限。四叔就認為，最好唔好減咁多，因為影響經濟及生意，總之「需要減就減，唔需要就唔好減」。
余絲韻