期指觀瀾：牛皮膠着情況持續
筆者前日決定追買國指期貨，開市價成本為10,300點，拓大「定向降準」的幫助之下，收市帳面有44點咁大把進帳。昨日A股失落MSCI，話就話唔少人心裏有數，得唔得只係五五波，不過昨日明顯見到，淡友連趁消息反攻的興趣都欠奉。
昨日國期高低位分別在10,359點及10,305點，全日54點波幅，個市幾咁牛皮，唔使畫公仔畫出腸。
恒指昨日跌58點收報23,257點，主板成交減少76億至525億元，兩隻舊經濟藍籌，中移（00941）及滙控（00005）各跌2%及1%，已經等於恒指64點跌幅。
恒指期貨日市收23,106點，較合理值高5點，國指跌10點收報10,508點，滬綜指反而無受MSCI的消息影響，升2點收報2,054點，作勢挑戰五月中至今的三頂格局。
工行（01398）將打頭陣除息，派末期息0.2617元人民幣，恒指計落會因此而少約74點。當然，高市值股除息唔係甚麼新鮮事，筆者只係想提醒恒指期貨及國期的「假低水」今日會相應地收窄，玩家務必留意。
昨日恒指波指數再跌0.2至13.02，繼續改寫新低，牛皮膠着情況仲要維持幾耐？世界盃即將開波，只怕六月中旬市況會更加買賣兩閒，缺乏方向。
John Mullen