匯海策略：英鎊向上方向不變

昨日，RBC把澳洲一四年GDP增長預測，由前估計2.9%，上調至3.2%，眾多利好澳元的消息已喺度，今日可唔可以破位衝多浸，朝早九點半公布就業數據相當關鍵。目前街外預測失業率會由四月5.8%回升至5.9%，如果好過預期，破咗0.9368的澳元，抽升多一兩百點應該阻力唔大。

昨日英國公布四月失業率跌至6.6%，創五年新低。原本一直話失業率去到7%樓下會調高利率的英倫銀行，一如聯儲局一樣唔認數，話要睇埋企業投資及外銷出口至會出手。簡單講，加息係有拖無欠。

姑勿論如何，昨日數據打破1.70水平扣關不成的英鎊近期級級落的悶局，即市由1.6755抽上1.6796，鎊匯距離近兩個月敏感三角上阻力1.6820只係廿幾點，升穿首站睇1.6915，再嚟係1.70大關。

歐央行放水兼推負利率，肯定吸引更多熱錢湧入，英倫銀行就息口去向取態會更惹市場關注，但中線睇，無論加同唔加，英鎊兌美元、歐元繼續向上的大方向不變。

阿Lam