Market Insight：廣汽蓄勢突破阻力

美國無通脹威脅，息口未有耐向上，加埋就業市場復甦持續，華爾街淡友無晒市場，唔信？俗稱恐慌指數的VIX，急跌8.1%去到10.73，創二○○七年以來新低，VIX愈低意味市場認為後市短期轉向的風險愈低。

簡單講，即係通街好友。標普500樂觀指數（Bullish Percent index）升至80.6，睇番過去三年，指數每次去到84至90例必掉頭，可見美股消耗性升市已開始，但仲未進入危險區域。睇嚟馬雲隻BABA（阿里巴巴美國上市代號）好有可能，食到正美國股市高峰上市，時機的掌握，真係不能不寫個服字。

古勝冇點你2014/06/09

萬里長空

美股強勢，唔多唔少都要多謝歐洲央行出招。眼見歐元區通脹，由一一年九月的高點3%，愈玩愈縮，五月跌至 0.5%的四年半新低，通縮威脅下，歐央行一次過請大家食齊一套救市字母粉，透過ABS、TLTROs、MROs，直接或間接提供市場流動資金，仲破天荒歷史性地推存款負利率，將銀行放在央行的存款息率，由0.1厘降至負0.1厘，實行鼓勵借貸，懲罰儲蓄。

歐推負利率博一鋪

消息公布後，歐元急跌去到1.35近五個月低位，之後意外地拗腰倒升，返到1.3630水平。有人用兩年前丹麥推存款負利率經驗，認定今次歐元必插。然而，情況有別，當日丹麥目標係阻截過多熱錢湧入推高丹麥克朗匯價，歐央行就唔同，希望藉負利率將銀行停泊資金趕出去支援實體經濟。由歐元V形走勢，似乎唔少外匯炒家認定措施短期應可刺激歐元區投資氣氛。

古勝估計，近日熱炒的歐洲高息債市場會火上加油，不過中長線而言，銀行會唔會暗啞底硬食負利率，也不願擴大借貸，最終適得其反，擠壓銀行利潤，甚至索性縮減資產負債規模，影響整個歐洲銀行業復甦，希望在下只係杞人憂天。

歐美市場星光璀璨，中港股市卻係發霉等運到，上周五恒指波幅指數跌至13.73，是接近十六個月低位，成個星期恒指累積跌130點收報22,951點。

其實唔單只股市，剛公布的五月澳門博彩收入增長放緩，四月香港零售銷售按年急跌，在在反映中央反貪腐的影響層面愈來愈廣。

新車預售反應理想

今日無論基金經理或者藥房老板，為生計都首要學懂得揣測政策動向。眼見政策市最壞的地方，是傳統投資理念，針對個別行業或者企業的微觀分析統統變得無效，近年搵到食的基金，唔少係孤注一擲，賭政策轉向又幸運地押中寶的機會主義者，市場日益劣質化，實在唏噓。

古勝睇好汽車股，見廣汽集團（02238）上周五股價突破，收報8.52元創個半月新高。五月份旗下汽車銷售升43%至7.77萬輛，首五個月累積銷量升35%至47.4萬輛，開始預售的廣州本田Fit，大行話收到預訂數目理想，好有可能超越公司每月7,000至1萬輛的銷售目標。

內地反貪，今年廣汽重點是針對普羅用家，車身加長但售價較上一代便宜的家庭車Fit，一四年業績保守估計，預期增長達五至六成增長，一四年市盈率10.4倍。第一季因為中央同污染宣戰，無特別利淡消息下，廣汽跟住一眾車股插水，股價曾見7元樓下，相信已見中期低位，保守計，年底前應該有機會升抵10至11元的阻力區。

睇見阿里入股恒大地產（03333）的足球隊，在下諗起過去有位炒外圍期指外匯發達的人兄，上岸後發財立品走去做足球隊班主的故事，一來算係做正行，二來可以藉此扶持下青少年球員同本地體壇發展，叫做回饋下社會。看來「足球」確有其獨特魅力，可以吸金！

中動向可水漲船高

講開足球，世盃開鑼有咩好炒，零食股CEC國際（00759）同一眾彩票股上周已率先起動，本周不妨留意體育用品股又會唔會接力翻炒，其中中國動向（03818）上周四及周五股價有異動。

講體育用品概念，呢隻股未必係首選，但勝在有阿里概念搭夠（事緣公司一一年透過認購雲峰基金資本投資了阿里），如今阿里在美掛牌叫價愈叫愈高，理論上中動向呢項投資身價亦水漲船高。走勢上，股價若能以大成交突破50日線1.43元，可望打破悶局。

古勝