股神巴菲特一年一度嘅午餐慈善拍賣會就快完結，起拍價2.5萬美元，出價最高嘅，可以同巴菲特共晉午餐，相信唔少得討教投資智慧，拍賣價已經超過100萬美元（約780萬港元），股神之前話有信心拍賣價會過百萬美元，依家已經達標啦。
其實股神謙啫，以往幾年輕易過二百萬美元（約1,560萬港元），今年又點會突然間縮水喎。
數吓手指，呢個慈善活動搞咗十幾年，○三年起轉為網上拍賣，「飯堂」依舊係紐約知名嘅牛扒屋，善款全部捐畀美國慈善機構。
拍賣價年年破紀錄，但有一年比較特別。話說喺一二年六月嗰次，買家以234.56萬美元贏咗個飯局資格後，可能一心想破紀錄，或者想做多啲善事，自願多付出幾十萬美元，將午餐價格提高到262.64萬美元，多過二○一一年嘅262.63萬美元一個馬鼻。今年成績會點，就拭目以待喇。
余絲韻