中銀人壽執行總裁老建榮（Terry）雖然姓老，但一啲都唔算老，依家仲Keep住個個星期踢波，今時今日嘅波友，仲係當年嘅小學同學，佢最愛當年小學年代、依家幾乎絕迹嘅「白飯魚」。
Terry話今年世界盃冇邊隊特別超班，估計巴西、德國、西班牙都有機會奪標，但英格蘭就唔睇好，佢仲話，自己捧咗曼聯好多年。佢嘅「波齡」計埋腳趾都數唔晒，依家一星期都會踢一次波，就算喺上海公幹嗰幾年，都仲Keep住呢個習慣。估唔到嘅係，今時今日嘅波友，仲係當年嘅小學同學，戴志偉同小志強已經全部變晒足球老將，不過Terry有陣時會叫埋個仔一齊落場踢，都會叫佢跑快幾步，「後生仔丫嘛。」
講起自己舊時小學雞年代，着住白雪雪嘅白飯魚踢波，貪佢踢街場夠晒貼腳，連扭波都勁啲，依家呢種「魚類」喺香港近乎絕迹，全部換晒三條間或有個剔嘅波Boot。
Terry咁多年嚟一直司職後衞，成為球隊一道重要嘅防線，今日就做埋保險公司老總，做全港人嘅後衞，都好順理成章。
余絲韻