絲絲講場：英國計埋黃毒 GDP砌大千億

國內生產總值（GDP）點計算有一定隨意性，英國國家統計局（ONS）九月就會開始將賣淫同販毒一併納入GDP，「肯定」佢哋每年為英國經濟貢獻100億英鎊（約1,298億港元），拍得住農業，令○九年GDP突然間多咗2.3%，仲話考慮遲吓加埋盜竊同老翻添！

其實嫖妓喺英國合法，ONS指，淫業經濟唔止嚟自全英6萬幾位性工作者、每星期平均接客25次，每次67.16鎊，仲包括開房、衣服、安全套等開支，單係○九年產值就有53億鎊。毒品亦不遑多讓，每年經濟規模達44億鎊，試諗吓○九年英國有220萬人Take大麻，一半人自家種，幾多生產成本呀！

英國今次咁做其實唔係咩破天荒之舉，只係同愛沙尼亞、挪威等歐洲國家睇齊。據報，意大利亦開始將毒品、非法軍火交易同賣淫納入GDP，估計新準則推行後首年，意大利GDP會增加最少1.3%，有助紓緩債務比重呢個令人頭痛嘅問題。

有學者質疑毒品條數可以點砌，ONS坦承數據唔及經濟其他環節咁準確，問卷未必有人做，但令GDP計法做到與時並進先係最緊要。加拿大豐業銀行英國經濟師克拉克就認為，雖然從事嗰啲活動嘅人未必會交稅，但起碼會消費，所以都有計落GDP嘅意義。

余絲韻