老友話呢排留意緊阿里巴巴旗下淘寶嘅畢加索作品拍賣，唔係啩？絲絲幫襯開，都係一百幾十蚊貨色，大師級作品都有？原來前幾日淘寶首次拍賣畢加索嘅真迹，拍賣價最終去到近115萬元（人民幣‧下同）成交。
唔知係咪大家都滿腦子問號，所以成個拍賣得幾個人競價，但就吸引咗超過600萬微博用戶做塘邊鶴，齋講冇幫襯。呢幅係畢加索晚年時嘅麻膠版畫《臉》，1蚊開賣，叫價165次後以近115萬成交。
阿里真係好鬼多動作，以前facebook有個網遊《開心農場》，阿里旗下聚划算平台都搞咗個現實版《開心農場》，名為「耕地寶」。投資者可以獲得私人農場一年四季嘅無公害蔬菜，仲有免費門票同住宿畀你去體驗田園生活。項目上線幾日，已有3,560個投資人合共投資咗200幾萬元，認購430幾畝地。
另外，阿里旗下支付寶同澳洲郵政達成為期五年嘅協議，海外商家可以喺天貓向中國消費者出售商品，同時，澳洲郵政門市分銷支付寶購物卡，澳洲嘅朋友可以喺天貓同淘寶齊齊Shopping。
余絲韻