Market Insight：乳業整合 低吸平貨

假期前，港股急挫284點，收報21,976點，兩萬三之後，看來連兩萬二都不堪一擊，望住大市主板成交得416億元，甚具乾跌味道，基金經理心知肚明，以近日的疏落成交，再隊落去套現效果麻麻，反而今浪由滬港通消息曝光後翌日，掉轉頭隊千三點落嚟，最飽應該係衍生工具莊家，殺牛殺到唔停手。

經一輪廝殺，數落去，最密集的21,500至21,599點都係相當於692張期指，睇嚟就算再落，都要等到牛仔被養肥至郁手。

早前參加個講座，有大行策略師認為，相比○七年一話開港股直通車，股民同基金發咗癲一樣將大市由萬九點炒上三萬二，今次無論內地抑或本地投資者，對滬港通的反應明顯冷淡得多，十居其九都認為無料到，但正因為咁反而阿爺會更放心，半年後開通試驗成功後，可以更進取的擴大兩地「雙邊投注」配額及玩法，因此個市下半年唔死得去邊咁話。

古勝冇點你 2014/05/07

萬里長空

PE平唔等如抵買

睇相佬呃你十年八年，這個預測，五個月左右就知得唔得，毫懷疑問，中港股市最大賣點係夠平，同埋頭幾個月大幅落後於其他新興市場，但夠平唔等於抵買，單係睇A股預期市盈率由去年初12倍話抵，搞到依家單位數，單係睇PE夠平已經唔足夠說服大孖沙入市，最弊係單睇一些具指標作用的數據，好似PMI以及新增貸款等數字，暫時仍未見到內地經濟增長放緩的拐點出現。

由入境處數字，「五一」假期首三日，入境內地旅客38.8萬，按年跌逾1%，以五月一日單日計，更錄得12%跌幅。另外亦有報道指，本地零售商今年生意與去年同期比較，有雙位數的跌幅。早前古勝話金飾股自去年底開始大落後，可以諗吓博反彈，現時睇嚟，似乎可以等多一陣，至少睇埋五月官方零售銷售數字有幾差，等零售股落多浸至郁手。

上周初，因為輝山乳業（06863）舊股東減持，累街坊搞到其他乳業股都一仆一碌，但見輝山洗到去1.5元水平已企定，睇落除非彤叔加入套現，否則暫時應該過咗危險期。

五月一日，國家質檢總局實施被譽為史上最嚴格乳業政策，全面對進口乳品境外生產企業註冊管理，首批包括來自十三個國家的四十一間生產商，至於其他不在名單上的企業，則不能向中國進口，直到通過中國認監委評估及註冊。

合生元吼位收集

瑞銀報告話，四十一間生產商，已覆蓋內地八成的市場佔有率，措施有利加快行業整合，提高產品質量及消費者信心。估計今次會有達四、五百種貼牌的扮洋貨嬰兒奶粉被逐出市場。

值得留意，消息本來對乳業股頗有利，但跌市之中，市場當佢無到，蒙牛（02319）旗下的雅士利（01230），周一股價仲要跌3.6%，收報3.71元，與去年十一月高位5.54元比較，累積跌掉三分之一，一四年PE為18.6倍，以今、明兩年大行預測40%及32%盈利增長，PEG得0.46倍，增長股之中佢唔算貴，最重要係依家買只係比第二大股東淡馬錫的入股價3.5元貴6%。

專攻高價路線的合生元（01112），因為今年部分進口牌子降價，市場驚毛利率會有壓力，股價由一月高位75元去到周一收51.6元，累積跌逾三成。新規定下，短期奶粉落價機會很微，一四年PE由30倍樓上回到令人接受的21.6倍，以今、明兩年45%及27%的預期增長，50元附近入得過。

華潤集團前董事長因涉嫌嚴重違紀而遭免職，系內五隻股份股價經歷震盪後已大致回穩，但估值被打折是在所難免，沒料到事件更為在港中企打貪整肅活動揭開序幕。由於現時主管中紀委的領導，曾在香港中企任職多年，熟悉運作，相信今次整頓一係唔做，一係就做得徹底。

紅籌風暴有下文

目前，除咗華潤，據講會進行審計的中企還有中銀、中信、光大及招商局，會唔會查出個問題來，不得而知。

但至少在有結論前，圍繞這些企業的上市子公司，唔多唔少都會蒙上不明朗因素，短線股價亦會受到限制，但長遠而言，紅籌股實際大股東其實就係阿爺，理論上可少擔心會關門大吉，而透過加強監察及管理，亦有助更有效保障國家及股東資產及權益，則未嘗唔係一件好事！

古勝