彩兒同Kitty咁貪靚，得閒最鍾意約埋一齊Shopping，其實股票如衣服，唔理吹韓風日風定台風，最緊要揀啱自己心水，「滬港通」最快半年後落實，香港股友多咗中國風揀，內地人喺香港除咗自由行仲有得掃股票，咁中港散戶係咪一定Buy呢？ 孖妹近排四出收風，發現兩邊原來都唔係咁Buy，「滬港通」分分鐘變此路不通？
林：民間股神 林園
李：人氣博客王 李杰
Rita：香港散戶
Terry：香港散戶
彩兒：Kitty你年紀咁輕，應該未聽過A股的血淚史，○七年A股牛氣沖天，股民個個賺到笑呵呵，點知當年十月滬綜指去到6,124點後應聲下挫，做足超過六年熊仔。依家滬綜指一直在2,000點附近徘徊，更時不時創出新低。
Kitty：原來A股有咁慘痛的經歷，點解好多內地散戶依然不離不棄？早排我搵到內地人氣博客王李杰，舊年佢嘅微博瀏覽量超過1,700萬次，同埋被內地媒體稱為「民間股神」嘅林園，梗係要捉住佢地嚟請教吓！
李：我唔覺得A股比境外市場難玩喎！如果睇多啲數據，喺過去廿年入面，A股的投資回報率其實好理想，就算你話滬綜指唔掂，但中小板、創業板同主板中唔難搵到大量倍升股，短時間內暴漲5倍，甚至是10倍都有。所以A股要由整體去睇，如果淨係識得睇實滬綜指，已經太out喇。
林：坦白講，依家喺A股入面賺錢喺好難嘅事，我自○八年已經無喺A股入面賺過錢，之不過依家A股嘅總體估值平，而且滬綜指的位置唔高，肯定喺入貨的好時機，揸住貨慢慢等，我閒閒地會持有三至五年。估值貴嘅股票我一定唔買，市盈率約15倍嘅先有投資價值。
彩兒：咁點先可以揀到好股票呢？
李：我覺得只要識得揀，依然可以搵到好多好股票，好似我一二年底睇好幾隻優質股跌到好平的價位，不惜賣咗一套投資性住房而加碼股市，重倉集中持有嗰幾隻股票，卒之去年個人回報達到一倍，邊幾隻股票我就唔方便講喇。之不過我可以講有一喲資產負債表健康、現金流良好及派息率高的傳統藍籌股最有投資價值，因為大部分的估值都低過頭，一年內估值得到重估並非難事，但要有耐性等待。
林：壟斷性行業好似能源及保險，只要政府唔開放市場，盈利肯定有保證，加上市盈率夠低，就好值得留意。我估計唔到牛市幾時嚟，但我一路都喺度等，因為股市有規律，過去幾年市場喺「擠泡沫」，我相信差唔多都擠乾淨喇，依家唔難等到股市日日升嘅一日。再講股市唔趁低買，唔通等到升市先嚟後悔？
彩兒： 除咗前輩提及嗰啲板塊，一啲喺滬港兩地上市的A+H股中，較H股有折讓嘅A股到時可能都有炒作空間，一來呢啲公司喺香港都有上市，比較容易掌握佢地嘅背景，二來早輪港股先瘋炒完一轉H股折讓股，有迹可尋。另外有啲喺香港買唔到嘅獨特行業，好似軍工、白酒同內地媒體股，話唔定都會變成搶手貨。
Kitty：我見依家港股嘅新舊經濟股輪流炒，炒完內房、金融股，轉頭又炒番科網、環保股，A股方面喺點玩？ 散戶又應該落注喺邊一邊？
李：中國嘅經濟結構轉型，好多新興產業都帶嚟投資機會，好似科網、醫藥、文化娛樂同高端製造呢一類股份，長遠肯定有投資價值，之不過呢類股份普遍估值過高，依家唔係買入嘅時候，反而舊經濟股更加有吸引力。最緊要嘅一點喺投資者揀好優質股票就應該耐心長期持有，保持理性應對市場波動，咁先可以立於不敗之地！
Kitty：睇嚟兩位星級內地散戶都喺鍾情A股，始終佢哋見證過A股嘅輝煌時期，滿有信心A股有得翻身，相反港股佢地就唔係咁吼喇！林園話自己早喺九十年代已經喺香港開咗證券戶口，長期買一啲消費類股份，「港股通」對自己嘅投資部署無咩影響，都喺A股好炒啲。
李：A股的投資機會夠晒多，我又玩熟晒A股的特性，暫時都唔會掂港股。
彩兒：我都聽過啲行內人講呀，內地股市嘅波幅夠大，單日可以去到20%至30%，相比港股單日波幅淨係得幾個百分比，炒味唔夠濃，因為一般散戶都喺鍾意短線買賣，至於炒股技藝較高的股民又已經喺香港開咗證券戶口，所以橫睇掂睇「港股通」對內地人嘅吸引力認真有限。
Kitty：竟然喺咁！另一方面，我見香港啲散戶講親A股都耍手擰頭喎，佢哋多數覺得內地企業嘅質素麻麻，管治質素同監管力度都不及香港，驚落錯注隨時有排坐艇。
Terry： 見住滬綜指由○七年高位跌咁多，真係睇到我心慌慌，對A股無咩信心，就算A股近期誕生好多倍升股，有啲心郁郁，但我到時最多都係小注玩下，當小賭怡情，一定唔會全情投入去買，反而受惠於「滬港通」嘅港交所（00388）更加值搏。
Rita：自新一屆中央領導上場，內地嚴打貪腐及造假，亦逐步改革A股市場，我覺得長遠A股一定有得諗，不過唔係喺呢個時勢買囉，依家個市況咁差，點買得落手？ 所謂「唔熟唔食」，我寧願買番港股，騰訊（00700）就係我嘅至愛喇！
彩兒：照咁講法「滬港通」暫時都唔係咁受中港散戶歡迎，莫非「滬港通」有機會兩邊都唔通？
Kitty、彩兒
若有料報畀彩兒同Kitty或有嘢問，
可電郵money.biz@on.cc