孖妹Ｓ檔案：「她經濟」當旺伊人薦愛股

李：新鴻基金融高級分析員 李惠嫻

莎莎 定位清晰議價力強

李：「去年第三季莎莎（00178）推出大減價嘅推廣活動，令市場憂慮其毛利率受壓，但我認為莎莎現價已反映市場憂慮，散戶不妨現價買入，半年目標價睇8元，止蝕價6元。雖然莎莎嘅估值仍算偏貴，但佢擁有大型化妝品股零售行業嘅龍頭地位，加上市場定位清晰，港澳地區共有109家店舖及專櫃，另外其零售嘅化妝品十分多元化，亦代理不少獨家品牌，早前更引入南韓美容品牌Banila Co.，獲得一眾少女歡心，以上因素都可為莎莎帶來議價能力，亦可支持毛利率穩定增長。另外，其電子商貿平台亦做得不俗，可吸納鍾意網上購物嘅女性消費者。」

利信達 往績佳 去存貨夠落力

李：「俗語話「觀音頭，掃把腳」，可見一對靚鞋對於女性嘅重要性。而利信達（00738）旗下有三個品牌，有鞋賣亦有手袋賣，le saunda屬於龍頭品牌，CNE則主打青春少女客戶群，Linea Rosa則為高檔品牌，以進口潮流皮具為主，不同品牌各有定位，有效主打不同經濟能力層面嘅女性消費者，令產品定價更有自由度。觀察往績，其港澳店舖銷售都有增長，帶動毛利率收入向來穩定，另該股於一三財政年度嘅存貨周轉期已減少21天至220天，集團亦表示會進行促銷去存貨，相信對品牌形象及毛利率影響有限，故給予半年目標價3.88元，止蝕價3.2元。」

陳：鴻昇證券資產管理部董事總經理 陳蓓敏

四環 心臟藥龍頭可長揸

陳：「年紀大，機器壞！基本上女人過咗30歲後就好容易周身病痛，加上都市人生活壓力大，令患病機會大增。在眾多醫藥股當中，我比較睇好四環醫藥（00460），首先公司基本因素不俗，亦是內地既心臟血管藥物嘅龍頭，公司有六款獨家藥品，如克林澳、歐迪美等，可為盈利增長帶來保障。雖然現時該股估值偏貴少少，散戶可等待股價回調至8.5元買入，預料半年目標價10元，止蝕價8元，當然大家亦可長揸。」

恒安 「單獨二孩」惹憧憬

陳：「女性特別愛乾淨，涉及嘅日常用品唔少，呢方面嘅開支都唔細。而恒安國際（01044）嘅業務就做紙巾、衞生巾、零食產品及護膚品，都算符合女性消費市場，過往業績向來交到功課，該股現正積極開展網上銷售渠道，相信會有利消理存貨，同時增加銷售量，前景應該不俗。另外，該股亦有「單獨二孩」概念，散戶可觀望未來內地公布更多有關生育政策細節，暫時預計其半年目標價88元，止蝕價80元。」

李：金英証券(香港)零售研究部副總監 李韻儀

六福 婚嫁年勢帶動銷售

李：「雖然女性鍾意鑽石，但唔代表金飾無市場o架！好似去年金價狂瀉，引發「中國大媽」搶金潮，便可發現黃金既可保值，亦有投資價值，而且近年金飾嘅設計趨向潮流化，可吸引較年輕女性購買金飾作佩戴。因此我就睇好六福（00590），第一，隨着外圍市況不穩定，金價上升令股價有支持；第二，該股收購金至尊品牌業務，有助直接打入內地金飾市場；第三，近期六福曾獲基金增持，大戶買得貨，呢隻股票衰極有限，而且今年屬雙春兼閏月，有利婚嫁事宜，相信亦可帶動六福嘅金飾銷售額，料半年目標價30元，止蝕價23元。」

文化產業股受惠投資普及

李：「大家以為投資藝術品就一定好貴好貴，早前我就去過保利文化（03636）嘅拍賣中心，見到有啲藝術品的底價都係二萬蚊左右，絕對係普通人可以負擔嘅範圍。其實今時今日嘅女性對投資愈嚟愈有個人想法，部分較為富有嘅女性甚至會投資名畫、玉器等藝術品。而保利文化隸屬中國保利集團，背景夠穩陣，該股主要做藝術品買賣，於內地亦有演出、劇院及影院管理，算是一種文化產業，而且不少藝術品屬於「物以稀為貴」，因此只有升值唔會貶值，我相信保利嘅業務大有前景，故給予半年目標價42元，止蝕33元。」

彩兒：高妹，我收到風話你原來已經秘婚！仲話你要離開魚缸，究竟傳聞係咪真o架？

高妹：紙包唔住火！無錯，我已嫁作人婦（幾個月），今後將歸田園居。雖然我都好唔捨得大家，不過我喺魚缸都浸淫咗六年，係時候畀機會你上位，以後全港散戶就交畀你好好照顧喇！

彩兒：吓！但我嘅炒股功夫仲未到家，我一個人未必搞得掂魚缸o架！

高妹：放心，我一早幫你搵咗新拍檔，呢個美少女好醒目o架，以後佢會陪你落魚缸偵查各類神秘事件。

彩兒：咁我都安樂啲，以後我榮升師姐，會的起心肝努力做嘢o架，你安心去做煮飯婆喇！

高妹： 臨別秋波，面對各位金融界好友，魚缸嘅分行經理及散戶，真係百般滋味在心頭，除咗感謝大家嘅悉心教導與愛護，最後我謹以最真誠嘅聲音，唱番隻飲歌送畀大家聽喇：「在最好時刻分離不要流眼淚，就承諾在某年，某一天某地點，再見……」

高妹彩兒

若有料報畀高妹同彩兒或有嘢問，可電郵money.biz@on.cc