Market Insight：騰訊走勢令人擔憂

至於其他蛛絲馬迹，仲有騰訊控股（00700）的阿Q突然其門如市，遇有獲雙馬寵幸的上市公司，股民有理無理亂捧一通，二千年科網泡沫爆煲前的種種徵兆，漸漸浮現。

阿里巴巴決定去美國上市，唔夠一個月，由科技股組成的納指，由4,333點撻落3,999點，跌幅7.7%，其他網絡股代表，好似facebook跌咗15.2%、Twitter跌21.6%，美國上市的中國網股搜狐亦跌19.4%、新浪跌22%，馬雲舉動，到底是準確預測科網股熱差唔多？抑或好多人同在下一樣睇住馬雲一舉一動食胡離場？

古勝冇點你2014/04/14

萬里長空

不過，這問題等同問有蛋定有雞先，實難有答案，但睇番近期科網股的確有見頂迹象（上周「滬港通」推高的騰訊幾乎翌日打回原形，可見排住隊食胡者眾），下星期新浪分拆微博在美國上市得定唔得，對後市有啟示。

滬港通細節待定

上星期焦點，自然係中央領導人在博鰲論壇中，拋出上海及香港股市互聯互通的「滬港通」計劃。同○七年的港股直通車讓內地人買香港股票的提議最大分別，是兩市雙向開放外，上交所會員代客買賣港股每日交易上限130億人民幣，累積計為3,000億人民幣，而港交所會員代客買賣的每日交易上限為105億人民幣，總額2,500億元人民幣，大約相當於兩地股市總市值的1.3%及1.9%，說少不少，但話多亦唔係多。

綜合來說，將來是否只限於同時擁有兩地證券牌照的券商參與？額度是先到先得抑或有其他分配？雖然A股弱，可是QFII額度其實長期緊張，來自QFII的額度需求應該唔細，如果先到先得，恐怕開市隨時幾分鐘已經被QFII基金搶晒，個人投資者點樣參與，仍有待釐清。而港人每日僅能兌換2萬元人民幣，要事先預備人民幣作交收，抑或有其他豁免途徑等等，睇落「滬港通」實在有點像自貿區，先拋出概念，細節先慢慢執。

本地券商挑戰大

姑勿論如何，現時重磅的H股，例如內銀及內險不少較A股存在溢價，至於大幅折讓的二三線H股，在在反映投資條件差勁，在下實在揀唔落手。瞎猜內地投資者口味，在下認為一些內地無上市的知名中資股，好似聯想集團（00992）及騰訊，長遠會受惠於內地熱錢南下。

以港交所去年每日平均625億元成交計，105億人民幣購港股上限，相當於日均成交一成七，港交所生意額勢必水漲船高，古勝並不同意額度細的說法，始終中港兩地股市大門打開，作為中國資本帳開放的重要試點，未來大趨勢必定是深交所與香港也達致互聯互通，以及整個投資額度逐步增加，只係消息被內地傳媒報道到今日成事，港交所股價已由120元升上最高148.5元，超買情況嚴重，不妨等股價返到接近135至140元，補番裂口至諗。

本地上市的內地券商股既有本地牌，亦有滬深券商牌照，肯定是既得利益者，然而一直被內地證券監管拒諸之門外的本地中小型證券行，競爭優勢進一步被削弱，將來面對挑戰定必更大。

騰訊上周股價曾作出反彈，但50日線又再一次得而復失，技術走勢令人憂慮。事實上，打從阿里話棄港赴美上市，科網股氣氛好似洩氣的氣球，皆因原本憧憬阿里在港以超高估值上市的炒作藉口經已消失，再加埋呢期美國科網股亦備受沽壓，一時間投資氣氛逆轉，騰訊亦難以獨善其身。雖然騰訊的股價波動大，相關衍生工具好炒，但刀邊舐血，真係要藝高人膽大，量力而為。

文化中國沽壓重

上周五，兩隻阿里概念股受壓，中信21世紀（00241）跌3%，收報5.16元；文化中國傳播（01060）股價曾低見1.38元，乃公布阿里入股交易以來的新低，結果收市仍急挫一成，報1.4元。若然真係要繼續向下回補上升裂口位的話，都咪話唔「甘」，而目前50日線正處於1.04元，與現價亦有一定距離。橫睇掂睇，都係做旁觀者最自保，古勝就奉勸看官千祈咪多手！

古勝