朱仔加入「1蚊CEO」行列

彭博社億萬富豪排行榜裏面排第二十二嘅facebook（fb）教主朱克伯格，最近亦加入行列，前年底薪50.3萬美元嘅佢，舊年將底薪一口氣減到1美元！

如果你以為朱克伯格只係擺個姿態，之後盡情加返股票花紅之類去補數就錯啦。監管文件顯示，朱仔舊年並無參加公司嘅花紅計劃，令自己薪酬由前年199萬美元，足足大減67%至65.3萬美元左右，而補貼大部分係用喺保安計劃、因私事坐私人飛機嘅費用。

三星高層大幅加薪

其他fb嘅領導舊年薪酬都比前年縮水接近40%，其中營運總監桑德伯格少咗1,000萬美元，科技總監斯科洛普夫同財務總監埃伯斯曼亦分別袋少810萬同700萬美元。

不過，業績同fb一樣強勢嘅南韓三星電子作風就相反，舊年高層薪酬獲得大幅調高，其中行政總裁權五鉉穩袋640萬美元，流動通訊部主管申宗均、消費電子部主管尹富根亦分別大賺600萬同500萬美元，統統超越對手Apple現任舵手庫克嘅425萬美元，或者算係雙方打官司期間贏咗佢一仗！

余絲韻