Google總部有貴客到，呢位貴客係你無論點估，都估唔到嘅少林寺方丈釋永信。少林方丈去到Google弘揚佛法，同場仲有加勒比海盜，有在場者不禁講句「嗰一刻，有種穿越嘅感覺」，發生乜事？
話說少林寺方丈釋永信去到美國加州硅谷Mountain View嘅Google總部弘法，仲帶埋一班少林僧人去。方丈對住百多位Google工程師講咗半個鐘演說，主要介紹少林文化。方丈仲話，Google對互聯網資訊自由嘅貢獻，與佛法中「眾生平等」理念相同。
方丈演說用中文講，班美國工程師靠聽即時傳譯，方丈既然係嚟弘法，自會有唔少佛法詞匯，好似「大千世界」之類，你話用英文點表達？睇住嗰位女傳譯員譯到滴晒汗，台下有唔少中國工程師聽到拍爛手掌，不過，爆笑亦唔少。
班美國工程師聽完方丈演講，有人仲即場向方丈話好想去少林寺短期修行。
呢個場合，點少得少林武僧，6位着住灰袈娑嘅武僧台上表演咗幾分鐘少林武術，而配樂竟然係電影《魔盜王》隻經典歌《He's a pirate（他是一個海盜）》！果然好「穿越」吓。咁特別嘅場面，班工程師即攞手機狂影，selfie就唔少得啦！
余絲韻