阿里巴巴終於講明會赴美上市，人未到，二級市場嘅估值已達到2,500億美元，其互聯網金融之手亦愈伸愈遠，收購節奏明快有力，猶如跳探戈舞，尋日又斥資2.15億美元（約16.77億港元）投資美國即時通訊應用程式Tango。
絲絲以為女人鍾意shopping，原來阿里今年嘅購物清單都唔輸蝕，除咗網上地圖繪製公司、文化產業及科技醫療公司外，尋日又添置新玩具，就係曾經風靡一時嘅美國即時通訊應用程式Tango。
外地傳媒報道，阿里去年底已經想投資Tango，比facebook洽購WhatsApp交易仲要早，幾星期前，Tango創始人與阿里創辦人馬雲喺北京會晤，最終靠Tango早期投資者楊致遠促成呢單交易。
其實Tango都算係即時通訊應用程式嘅鼻祖，話說走在時代尖端嘅絲絲，四、五年前就已經用Tango，都算係幾好使好用嘅！
不過，科技總係日新月異，人又點會唔變心呢，WeChat、Line、WhatsApp嘅出現，令喺內地有番咁上下市佔率嘅Tango都要行埋一邊。唔係話唔信阿里嘅眼光，不過，絲絲今次就真係唔係好睇好囉！
余絲韻