Market Insight：支付股無妄之災

上周五晚美股道指最多升過56點，收市倒跌43點，報16,065點，恐慌指數（VIX）升1.6至17.82，去到超過一個月高位，資金繼續湧入避險資產黃金，周五金價升至每安士1,382.5美元，已升穿去年十月高位1,361美元，扭轉一浪低於一浪的形態，走勢上，1,180美元雙底是否成立，關鍵是後市可唔可以突破1,434美元頸線。

上星期港股收市後，賓架界已傳阿里巴巴95%機會會放棄香港，落實在美國上市，周末阿里巴巴官方微博亦都證實消息，啟動美國的上市程序。外電報道，最快四月在美國提交上市申請，據市場最新估值去到1,530億美元，相當於1.193萬億港元，比騰訊控股（00700）上周五的1.096萬億元多近一成。

古勝冇點你2014/03/17

萬里長空

騰訊「阿Q」賣得最好

在下曾講過，今年邊個都可以唔信，但一定要信馬雲，今次佢等唔到就極具爭議的合夥人制在香港進行諮詢，就急急趕往美國上市，同傳聞中第三、四季招股，足足早了幾個月，似乎多少擔心美股及科網股的升勢快將告一段落，所以趁未落雨趕去收柴。除阿里外，新浪網亦都將手上最值錢的微博，趁市旺申請在美國進行首次公開招股，集資5億美元。後市點睇，已經唔使畫公仔畫出腸。

事實近期私人銀行賣得最好的，就係騰訊的accumulator及ELN等關連產品，呢批半專業散戶（開得私人銀行戶口至少都過百萬美元資產）見股價有升無跌，已經忘記幾年前阿Q殺人無數，要知大戶賣騰訊阿Q變相係sell Call出街，唔係話股市一定係大食細，但畀你揀一邊企，斷估無理由企大戶對家也。

上周五市場焦點，是三年來第二次伸手要錢的新世界發展（00017）宣布「三供一」，集資133至140億元，以私有化新世界中國（00917）。

港府雙辣招下，本地地產商收入愈來愈依重中國大陸，是鐵一般事實，這點從新地（00016）、長實（00001）早前業績可見一斑。今次交易令市場感到意外的地方，是一間股價長期低於資產淨值及帳面值的地產商（0.36倍PB），再以折讓供股，以一個不便宜的價錢，私有化在會計上已屬於附屬公司的子公司。兩個動作，都只會令新世界股價資產折讓減少，小股東為免被攤薄，除啞忍焗供外，並無他選。

啞忍焗供別無他選

私有化新中的出價，相當於1.02倍PB，比目前內房股平均的0.87倍貴，一四年PE係12.8倍，亦比同業的5.1倍高一截，如果信彤叔眼光，認為大陸地產有得搞，小股東倒不如自己買其他內房股。不過，私有化不可能一無是處，否則好難說服兩間公司街外股東投贊成票，例如，至少合併後新中融資成本可以慳番唔少。

除此之外，對新世界股東，先苦係咪一定後甜？好難講，但至少短期好處有限，上星期股價隊到落8.27元，返到○六年水平，股齡有限的股民，或者唔知九七年新世界係曾經見過40元樓上的股票，樓市老早過九七高位，新世界比歷史高位僅剩兩成，其實一圖勝萬言，已經話畀大家聽新世界有幾咁難玩。

突然煞車傷了股民

人行喊停虛擬信用卡及二維碼支付項目，古勝同缸邊友一樣感到費解。照計呢啲項目唔係一兩日就推出市場，籌備已有一段時間，理論上監管當局無理由唔知，點解到呢一刻先至叫暫停？

負面消息突然而至，支付股全線笨豬跳，上周五環亞智富（01390）跌7.9%、中國創新支付（08083）跌14.6%、神州數字（08255）跌6.4%、百富環球（00327）跌7.1%、高陽科技（00818）跌2.8%。官方既然表態支持互聯網金融發展，作為一個負責任的政府，應該好好先籌劃完善同清晰行業法規，情況等於開設遊戲者，有責任定明遊戲規則，清清楚楚先至好讓參與者開波，搞到半路中途突然喊停，唔湯唔水，害了企業利益亦傷咗小股民，咁又何必！

古勝