港交所（00388）尋日派成績表，雖然業績冇預期咁好，但高層人工花紅就照樣「大豐收」，好似行政總裁李小加，去年底薪、現金花紅、股份獎授福利、以及其他福利等等，合共就攞成3,820萬元，比起上年度2,457萬元，大幅增加55%，今回唔係「小加」，係「大加」至真。
睇番前年，佢嘅總收入只係增加6.5%，去年度總收入增幅卻高達55%，但港交所去年度純利只上升11%。唔知小股東覺得合唔合理呢？
小加總裁何以錄得咁高收入？原來佢嘅底薪由764萬元，加到865萬元，增加13%，高過通脹好多。呢啲都只係Peanuts（濕濕碎），戲肉係股份獎授福利由924萬元，大幅增加到1,892萬元；現金花紅由656萬元，加到937萬元。所以小加去年總收入直情好似收購LME「天價」咁高！
之不過，佢前年斥天價買番嚟嘅LME，暫時仍未生金蛋，而且引致嘅折舊及攤銷等等更拖累港交所業績。唔怪得尋日分析員會議，大部分都係追問有關LME嘅問題，比如話LME幾時先會提供顯著盈利貢獻等。
李小加當然大派定心丸，叫大家畀啲耐性，但等吓一年又一下，尤其係中小經紀，都明顯有啲不耐煩。希望收咗大筆和味花紅嘅小加總裁，真係唔好令大家失望！
余絲韻