太平洋投資管理（Pimco）行政總裁埃利安突然辭職後，坊間盛傳埃利安與「債券大王」格羅斯不和，當事人例牌否認，但《華爾街日報》引述消息人士爆料，二人曾公然駁火，又揭露Pimco工作壓力甚大，格羅斯更有魔鬼上司作風。
埃利安主張較有組織嘅管理手法，明顯同格羅斯迥異，但兩人甚少公開衝突。不過，去年夏季就生變，面對債市受壓、虧損擴大及投資者紛紛贖回，Pimco總部氣氛緊張，二人對交易策略、人事決定及新產品等意見不合嘅情況亦愈來愈多。
去年六月某天，格羅斯同埃利安喺超過十名同事面前公然駁火，格羅斯質問佢：「我有41年卓越投資紀錄，你呢？」，埃利安反駁話：「我已厭倦幫你收拾『蘇州屎』。」
Pimco現任及已離職員工仲加多一腳添，大數格羅斯魔鬼上司作風，原來大部分Pimco投資人員朝早四點半就要返到公司，至少五點至走得。
格羅斯唔鍾意員工同佢攀談甚或有眼神接觸；如果有人製造噪音，即使係投資話題，都會遭到訓斥；格羅斯對投資委員會報告要求嚴格，曾經責罵忘記標上頁數嘅員工，亦唔鍾意員工同佢唱反調。
據聞格羅斯喺埃利安提醒下，曾經改變吓，但好快又故態復萌。二人關係漸起變化，格羅斯講明，就算冇咗埃利安都能掌控大局。有次埃利安喺會議中，與同事討論債券以外嘅投資議題，格羅斯好不屑咁走出會議室，搞到會議中斷，兩人關係差到咁明顯，埃利安唔走至奇啦。
報道出街後，格羅斯勁嬲，話報道誇大失實。亦有人為佢講好話，話佢係Pimco嘅喬布斯喎。總之就係清官難審家庭事啦！
余絲韻