如果大家唔係太善忘嘅話，應該記得前任刑事檢控專員薛偉成，臨別秋波前，公開質疑證監會嘅執法權力過大，雙方關係一度「緊張」。
尋日新任刑事檢控專員楊家雄畀面出席證監會首次舉辦嘅論壇，同有「打虎英雄」之稱嘅證監會法規執行部執行董事施衛民同場較量，互相切磋，氣氛不知幾好！
「股壇長毛」David Webb就形容，證監會同新任刑事檢控專員嘅關係，就好似一對已經離咗婚嘅夫婦，依家終於「開始有番偈傾！」
咁被問及雙方關係，係咪開始好轉時，Webb仲笑住話，「佢哋關係應該冇可能再差得過以前！」。佢個比喻真係令絲絲笑到碌地，但諗真啲，又真係幾貼切喎。真不愧為股壇長毛，敢言又有幽默感！
不過，講番證監會權力過大，雖然市場議論紛紛，但畢竟證監會近排「打老虎」好積極，上市公司監管權也「不經不覺」由港交所轉移到證監會，站喺小股東立場，應該係舉腳支持。
余絲韻