曾經係內地基金界一哥嘅王亞偉，雖然已經離開咗華夏基金自立門戶有近兩年時間，但個「朵」喺業內仍然係非常之響亮。
尋日內地有魚缸消息指，中證監正調查一單「史無前例」嘅老鼠倉交易，單嘢到底有幾史無前例，金額原來唔係最關鍵嘅問題，重點係涉案人物名氣非常之大，據說係同王亞偉「不相上下」。
魚缸消息就話，今次呢單案件事發地點係喺深圳，原來深交所本身有一套「大數據」系統，主要功能分成對內部交易監察、對重大事項交易監察、聯動監察機制同實時監察機制四個方面，有呢個分析平台幫手，就可以輕易咁跟蹤到盤中嘅異常交易。
就好似早排，交易所就通過日常嘅監控程序，發現咗一個涉資十億人民幣嘅老鼠倉帳戶，至於嗰個涉案嘅基金經理，當然已經畀人拉咗啦。
今次再傳中證監查大鱷，仲要個「朵」咁響，股民即時開盤口玩競猜遊戲，大家完全由個「名氣」入手，只要可以同前一哥相提並論嘅業內投資大佬一個個被點名。
睇怕近排內地基金經理聽到有人讚自己名氣大，應該都好難開心喇。
余絲韻