絲絲講場：張樹槐帶齊「全家」冒險
馬拉松發燒友恒生銀行（00011）傳訊及可持續發展總監張樹槐（Walter），新年期間遠赴阿根廷挑戰阿空加瓜山（Aconcagua）。Walter最高攀登至海拔6,300米（2.1萬呎），相當於13幢環球貿易廣場（ICC）嘅總高度。據聞喺佢登山前數日，有兩名20多歲嘅美國年輕人，在相若高度意外墮崖喪生。Walter仲話今次帶埋「家人」登山添，乜咁危險呀！原來絲絲搞錯咗，佢只係帶埋家人張相片去啫。
Walter帶同和家人嘅合照及聖經金句攀登2.1萬呎高峰，站在山峰上，Walter體會到何謂「大地在我腳下」，佢仲以聖經詩篇來讚嘆造物者嘅神奇和偉大。
4200米上網買基金
整個攀登行程歷時13日，上山下坡全程達100公里。身處高山空氣稀薄，咁係咪要食定好多藥呢？Walter竟然話堅決唔服食任何防止高山症藥物。沿途寒風凜冽，夜間氣溫低至攝氏零下25度，曾經有兩晚因帳篷被時速達30至40公里嘅強風吹襲而徹夜難眠。
今次佢都喺阿空加瓜山海拔4,200米嘅基地營（Base Camp）做咗個創舉，佢使用恒生個人e-Banking購買了恒生H股指數基金。
余絲韻