Market Insight：科網狂潮還看阿里

今時今日，間間央行都想盡辦法做低匯價刺激出口，澳洲央行更講到出口。目下唯獨中國因為○九年4萬億元人民幣救經濟搞到一鑊泡，加上地方債務問題同埋四大行老奉要錢伸手，迫使人行出手整頓，結果中國走在新興市場之先，最早退市（亦可說成炒家睇死人行無條件唔理通脹而再放水），結果熱錢湧晒去賭人民幣升值。

近期市場做好心理準備，迎接人民幣兌美元由六算走到五字頭水平，如果遊戲規則真係匯率同股市相對的話，近期A股咁鬼弱勢，除咗因為IPO重啟之外，相信同高匯價亦不無關係。

冧巴客進場非吉兆

隔晚華爾街股市跌179點，好彩滬綜指仲守住二千點關口死唔晒，港股尋日低開後跌幅收窄，最後跌97點，收報22,791點，恒指波幅指數由十月中接近19跌到尋日的15.06，比過去半年平均值16.6低近一成，大市已經在22,500至24,000點之間牛牛皮皮幾個月，斷估唔少缸邊客已悶得半死。

古勝冇點你

萬里長空

但實情今個星期，古勝突然收到幾個無買開股票的老友來電要攞「冧巴」，在在反映指數雖然唔得，但唔少二三線股鑊氣幾勁。從歷史經驗，收到呢類電話都唔係好兆頭，在下真係要好好考慮減吓磅。

尋日提過TMT狂潮，連文化傳信（00343）都開車真係有些少風險，話口未完，手遊股終於要回，IGG（08002）跌12.3%，博雅（00434）跌13.5%，網龍（00777）跌6.1%，雲遊（00484）跌5.6%，總之係升得多，跌得多。對於預測內地網股今浪可以炒幾耐，老老實實，古勝信馬雲都唔會信班投行大孖沙（睇番以前阿里巴巴上市同私有化時機的拿揑，大概可知一二）。市傳阿里巴巴五、六月可以上到，照計冷靜番一排，手遊股及其他網股都係要睇番。

港股市值有望提升

講開阿里巴巴，賓架界吹風真係愈嚟愈誇張，講到以介乎25至30倍的一五年預期市盈率上市，招股市值隨時去到兩千億美金，即1.56萬億港元，換句話，一開波已經同市值相若的中移（00941）咁高咁大，亦僅次於滙控（00005）及工行（01398），而阿里加埋騰訊（00700）兩隻巨無霸，市值達2.5萬億港元，對一眾網絡股當然發揮到「成行成市」的作用。

於未來幾個月，相信阿里概念受惠股，仲係會陸續浮現。古勝諗到較正路的肯定係港交所（00388），事關個市就算唔升唔跌，整體港股市值起碼即時多咗5至6%，仲未考慮好似IGG、博雅一類炒作受惠股對整體大市成交的拉動作用。

首三季港交所賺35.28億元，升9.6%，因為投資收入較預期高以及稅項安排，業績比大行估計好，從近期靜市成交都有六至七字頭，似乎去年第三季日均成交552億元有可能見底。

該股股價最近落番去125至126元，亦即係去年十一月中爆升前的起步位，加埋幾乎間間大行都唱淡今年中港股市，股價已經充分反映悲觀情緒，在下認為現價反而有投機吸納睇一至兩季的吸引力。

去年末季的新股熱潮延續至今季，夜店股Magnum（02080）認購反應火爆，而半新股亦炒到開巷，昨日美捷匯（08209）股價急升逾兩成，中國信達（01359）及環亞智富（01390）股價均創即市新高，可見呢期肯坐半新股，收穫甚豐！

金天醫藥博上水面

繼續聚焦半新股，耐世特（01316）近日股價調整，連續兩個交易日守穩4.3元水平，昨日收市報4.56元，逆市升2.4%，如無意外整固完成，可再次挑戰高位4.97元。此外，鳳凰醫療（01515）在11至12元水平橫行已逾月，收乾貨後有條件再開快車，值得期待。論落後，同屬醫藥板塊的金天醫藥（02211）昨日收報2.65元，尚在潛水，近四個交易日低位不斷上移，亦似醞釀突破，博佢重上水面，現價追入都值博！

古勝