絲絲講場：郭炳江講古教細路解困

郭炳江今次化身Uncle Thomas，喺聖誕節前同一班小學生玩遊戲、派禮物，仲講咗個溫馨故事添！佢講嘅就係名為《沒關係，沒關係》嘅故事，講述一對爺孫嘅生活，喺成長路途上孫兒要面對不同嘅壓力，但爺爺總係以「沒關係，沒關係」咁安撫佢。

郭炳江藉此鼓勵小朋友，日常生活可能因為各種問題感到憂慮，但都「沒關係」，因為身邊有父母、老師、同學及朋友守護，只要多啲同身邊人分享感受，任何事都能夠迎刃而解，小朋友聽完都用番「沒關係，沒關係」回應佢！

成立「新閱會」推廣好書

聽完故事後，幾位小學生代表仲送咗一本叫《爺爺我愛你》嘅故事書畀Uncle Thomas，祝佢身體健康、開開心心，而Uncle Thomas就送薑餅人畀小朋友，真係一個窩心嘅聖誕！

Thomas話新地致力推動閱讀同全人發展，最近成立「新閱會」推廣愉快閱讀平台，另外又特別贊助聖雅各福群會，喺堅尼地道新大樓圖書館，添置各種書籍及不同設施。新地同時與聖雅各合作展開為期一年嘅「新地齊閱好品」生命教育活動計劃，每月透過閱讀、遊戲、角色扮演及講故事嘅工作坊，培養基層兒童建立讀書興趣。

余絲韻