挨近年尾，又係埋單計數嘅時候，銀行公會都唔例外，就快「落莊」嘅洪丕正尋日趁今年最後一次例會，交代過去一年做過啲乜，聽落真係唔少，跟住落嚟接莊嘅中銀香港（02388），唔知有冇壓力呢？
洪丕正話銀公今年工作都幾繁重，總共設立39個小組，比舊年多咗8個。
而小組就一共開咗250幾個會議，即係話差唔多每個工作日都有一次會議，中間亦經過好多嘅討論。
其實渣打香港今年做銀行公會主席行，都唔止淨係同其他銀行開會處理業界事務咁簡單，仲搞咗好多義務活動，而且係由下而上，由長至幼都有份，例如畀學生哥增廣見聞嘅銀行通識研習坊、十場長者活用自動櫃員機工作坊等。
做得銀公主席，好多時洪丕正都有親自落手落腳參與埋一份，唔怪得之佢話今年工作幾繁重啦。