花旗香港會德豐分行自八三年開業至今已經30年，最近神不知鬼不覺執一執，依家行Smart bank路線！分行都翻新，唔知同樣喺花旗打拚足足30年嘅花旗銀行環球個人銀行服務香港區總經理林鈺華會唔會一齊轉過新Look？
花旗香港總共有43間分行，24間係智能分行，其他分行陸續會Upgrade埋，明年仲計劃開多兩間分行添！點解要行電子化路線？
林鈺華強調唔係Cut人，而係畀客戶有更好體驗，銀行生意效益提升當然係其中一個原因啦！聽講花旗香港一○年Relocate過旺角分行，包裝成旗艦店，該分行收入多咗一倍！提升其他分行唔係無原因o架！
林鈺華希望，今次翻新會德豐分行可以令該分行收入倍增。不過，佢就補多句，本身呢間分行都做好多生意，增長率未必夠旺角嗰間咁勁喎！
對林鈺華嚟講，八三年其實係好重要嘅一年，因為佢就係喺呢一年加入花旗。即係話，佢已經喺花旗渡過咗三個十年，唔知林鈺華幾時又會換下髮型，轉個全新形象咁呢？
不過，轉形象之前，唔知前線員工嘅明年加薪幅度有無得提升呢？林鈺華就笑笑口咁話，個加幅喺市場上好有競爭力！