平時絲絲去戲院睇首映就多，去酒店睇就第一次！香港上海大酒店（00045）旗下嘅香港半島酒店尋日就舉辦首映禮，播放名為《經典‧傳承》嘅紀錄片。
現場仲布置得好有心思，除咗有個小影院，仲有仿照六、七十年代電影院嘅售票處，擺放多款懷舊小食好似砵仔糕、龍鬚糖、糖葱餅、飛機欖等招呼嘉賓，絲絲真有種時光倒流五十年嘅感覺！
講番今次呢部紀錄片，意念其實源自大酒店非執行主席米高嘉道理爵士，原版喺九四年推出過，今次放映嘅係更新版，同樣將嘉道理家族點樣打造半島酒店品牌嘅故事娓娓道來。新版本加添明年啟業嘅巴黎半島酒店介紹，以及將酒店原址大樓復修嘅艱巨工程。
負責監製嘅係有超過35年製作電影電視嘅Elaine Forsgate Marden，佢原來同米高係世交，細細個已經識，仲曾經為中電（00002）製作一齣長達1小時嘅紀錄片！兩人一一年重新構思製作新版紀錄片，到片尾絲絲仲發現米高嘅囡囡Bettina，仲係製作助理添！
成齣紀錄片長45分鐘，由上世紀20年代開始細味大酒店嘅每個里程碑，當中嘅照片同影片係製作團隊走訪全球搜集返黎，非常珍貴，好似回顧咗近百年香港同上海嘅歷史咁！
套片下年會喺全球半島酒店所有客房內播放，適逢今年係香港半島酒店85周年，呢份一定係最有紀念價值嘅禮物！
余絲韻