Market Insight：半新股輪流翻炒

全球主要央行之中，看來只有人民銀行貨幣政策最為保守，近期人行逆回購都係「就住就住」，中標息率近4.1厘，顯示中國無積極推低市場利率的意圖，亦因為咁，相對外圍股市，中港股市確實有拉牛上樹的情況。

昨日期指結算，大市一度升穿年初23,944點的高位，可惜再挾上動力唔夠，恒指見過24,014點兩年半新高後，在A股升幅收窄，以及午後期指結算平均價取樣樣本足夠後，在最後一小時打回原形，恒指倒跌17點報23,789點，主板成交633億元，上升及下半股份分別有618及667隻，升跌比例1：1.08。今日基金月結，相信粉飾活動今日先會見真章。

古勝冇點你2013/11/29

萬里長空

炒鄭煤機要識落車

昨日提過煤股應該未炒完，秦皇島煤價向好，主要係年底往往係煤電談判，訂立新一年合約價的大日子，煤商有意無意都會減少出貨量提高講價籌碼，加埋市傳國務院提出扶持煤企的消息，包括管理煤礦產量增幅以及減輕煤炭企業稅付，兗州煤業（01171）昨抖抖跌0.4%，輪到中國神華（01088）及中煤能源（01898）發威，分別升1.5%。

意想不到係，連鄭煤機（00564）都有啲鑊氣，超過九球成交股價見5.61元創下半年新高，但對比年初高位12.28元，仲係一半都無。

睇番訂單減少下，鄭煤機首三季盈利大跌四成二至6.98億元人民幣。要知開採用煤機，一般要等煤炭市場火熱，供不應求礦主先會投資擴產。近期煤炭價格因為季節性及人為因素回升，但要旺到煤機生意反彈，似乎十畫未有兩撇，博反彈無妨，但緊記快炒兼要識落車。

翠華估值仍屬偏高

餐飲業奇葩翠華（01314）出成績表後股價散咗，昨插5.3%落番去5.3元。公司半年業績賺8,549萬元升32%，和營業額同期42.7%升幅相比稍為遜色，期內毛利率升0.1個百分點去到69.8%，食物成本則升42.8%，以上半年香港近4%通脹來看，其成本控制已經好到無話可說。盈利升幅低於收入，主要係新開分店折舊及租金成本上升影響，以及新店營運初期嘅開支較高所致。

睇番瑞信份報告，之前預測上半年純利率12%，依家最終出來有12.3%，算超額完成。一句到尾，係市場期望太高， 一三年市盈率38.6倍，同大快活（00052）及大家樂（00341）的13倍及24倍相比高一大截，業績好都唔夠，要相當好至得。

古勝見佢餐包迷你咗，仿鮑片通粉突然變咗粟米通粉，多少feel到管理層想由食物成本方面打主意拉高毛利。但既然翠華走高級茶記路線，食物質素唔能夠太離譜趕客，最弊係人仔短期睇升，食物成本的自然調整，在可見日子回落機會唔大。上市前透露翻枱率係極限級的一枱一日25張單，看來多開分店谷業績之外都無乜計，在下認為，應可等股價回到八、九月的4.5至5元橫行區至諗未遲。

原生態要望多兩眼

半新股陸續發力，新晨動力（01148）本周初見上市以來新高4.96元；認購反應一般的中滔環保（01363）股價後發先至，本周股價升穿3元關，較招股價1.48元翻一番有多；昨日開始發力的就有耐世特（01316），升4.5%；國際家居零售（01373）上周股價重上水面後亦一帆風順。

本周掛牌的原生態牧業（01431）尚在潛水，但乳品概念長炒長有，相信等收夠籌可再開車，可以留意低位承接。至於短線有勢重上水面的半新股，則有重慶銀行（01963）（招股價6元，現價5.88元）及毅德控股（01396）（招股價2.15元，現價2.07元）。

古勝