美國聯儲局前主席格林斯潘雖然退下火線多年，但佢在位期間嘅功績仍然備受爭議。格老新作面世之際，諾貝爾經濟學獎得主克魯格曼睇過書評後，對於格老拒絕承擔金融海嘯嘅責任，毫不客氣狠批格老係「世上最差的前央行行長」。
格老對上一次出書已經係○七年秋天，當時佢卸任聯儲局主席超過一年，但本書出版後不久，就爆發世紀金融海嘯，簡直係剃格老眼眉。好多人都知，格老任內為銀行合併業務開綠燈、推動放寬金融監管、提倡降低銀行資本儲備嘅國際規則，亦冇採取措施限制濫發次按，於是批評引發金融海嘯嘅矛頭紛紛指向格老。
不過，睇番格老本新作，格老似乎冇吸取金融海嘯嘅教訓，繼續信奉自由市場，反對市場監管，並認為累進稅同社會開支係經濟增長緩慢、工資增長呆滯同財赤擴大嘅主因。
克魯格曼睇完書評後，好勞氣咁喺《紐約時報》專欄話，格老唔單止係差勁嘅經濟學家，亦係一個品格惡劣嘅人，因為佢拒絕為任內以至任外嘅錯誤承擔責任，而且到現在仍不知悔改。
余詩韻