絲絲講場：垂直馬拉松衝上ICC
好快又會有世界冠軍喺香港誕生，今次係垂直馬拉松世界巡迴賽。平時見嘅馬拉松係向前跑，呢鋪就係向上跑，換言之，要夠晒高嘅高樓大廈先有資格做比賽場地，新鴻基地產（00016）旗下嘅環球貿易廣場（ICC）就夠晒高喇。
新地主辦嘅慈善賽「勇闖ICC-100」尋日舉行啟動禮，新地主席郭炳聯亦身兼活動籌委會主席，佢話今年比賽面向國際，成為垂直馬拉松世界巡迴賽嘅終點站，世界冠軍將會喺香港誕生！
跑2120級樓梯決勝
今年垂直馬拉松世界巡迴賽跨越美國、瑞士、西班牙、台灣、北京等摩天大廈，而香港站嘅ICC將會係終極一戰！活動會由ICC嘅8樓做起點，總共跑82層，一共2,120級樓梯，係八個巡迴賽站中梯級最多嘅一站！今年除咗有「精英賽」、「個人賽」、「企業隊際接力賽」之外，更新增「滿FUN體驗」活動，只要年滿16歲即可報名參加，旨在體驗喺香港最高建築物中步行，不求名次，希望可以吸引到一家大細參與。
絲絲雖然無跑樓梯嘅習慣，不過平時都有跑步健身，練得一雙鐵腿！專家話，原來跑樓梯比游水可以消耗多2.5倍卡路里，每日行200級樓梯，一星期行五日，持之以恒兩個月，體內嘅壞膽固醇可以減少8%，整體死亡風險更加可以下降兩成添！