蘋果公司（Apple Inc）近期着手推動iPhone「內產內銷」，極力將內地打造成「第二本土市場」，就連請人方面亦似乎大有玄機。蘋果公司上月底就開始喺佢內地嘅官方網站，刊出聘請廣告，着手聘任網絡技術工程經理。
其中，應徵者一個必備條件係必須對大中華地區所使用嘅2G、3G以至4G等所有技術標準有全面認識，明顯係要協助iPhone打通大中華地區所有網絡。
唔知係受制於技術條件定係商業條款限制，大家都知道就算係最新嘅iPhone 5c及5s，至今仍然未能使用大中華地區個別網絡商嘅4G服務。而蘋果公司尋求聘任網絡技術工程經理，其中一個主要工作，就係處理大中華地區所有電訊商嘅技術接口問題，亦協助蘋果公司相關產品獲得所需嘅各種技術認證。做得呢個位，除咗要認識各種技術同規管要求外，當然亦要精通英文同普通話，雖然聘請廣告並冇交代薪酬條件，但由於明言應徵者最少要有十年電訊業經驗，份人工睇怕最少都拍得住中小電訊商嘅科技總裁（CTO）嘅人工。
呢個廣告嘅出現，當然令人猜測今次請人，係要為iPhone打入中移（00941）嘅網絡鋪路，不過絲絲嘅電訊業好友就相信， 中移同蘋果公司合作只係時間問題，蘋果公司設立呢個職位，或者更應被理解為iPhone走向全面開放嘅部署，而事實上當日本同內地各大電訊商已經或正準備引入iPhone同時，蘋果公司已冇乜理由限制產品使用個別營運商嘅網絡，而呢一個策略轉變對蘋果公司日後發展，亦會有深遠嘅影響。
余詩韻