絲絲仲記得比亞迪電動車E6啱啱喺上年話因猛烈撞擊着火，真係估唔到美國貨特斯拉（Tesla）都會係咁！話說汽車論壇Jalopnik貼咗張Tesla出品嘅電動跑車Model S喺華盛頓州着火嘅相，累到近期係咁破頂嘅Tesla股價，禮拜三一下子急插近一成。
話晒Model S係特斯拉王牌，締造電動車嘅神話，帶挈公司市值今年幾級跳，車壇雜誌《Consumer Report》今年給予Model S測試評級贏盡同業。不過，就好似比亞迪電動車着火嘅歷史經驗，股民唔理咁多，一於沽貨先，Jalopnik亦無解釋相中Model S起火原因。
特斯拉見勢色唔對，即刻發聲明話嗰架Model S着火係車禍撞擊造成嘅，因撞到路中大型金屬物體，令到車身損傷嚴重，並由電池開始着火，司機安全離開座駕並報警。華盛頓州巡警話已搵到可能同今次撞擊嘅金屬瓦礫，意外報告要過幾日至出爐。
上次比亞迪澄清着火嘅E6起火非因電池，但今次特斯拉就話由電池起火，相信大家又再擔心電動車嘅電池問題喇！券商Robert W. Baird & Co.隨即調低特斯拉投資評級，由「跑贏大市」降為「中性」。