絲絲相信唔少打工仔每到放工時間，都恨不得即刻飛撲返屋企，但Facebook（fb）員工就因為公司太「梳乎」而唔願返屋企！
Facebook於是就決定，喺公司附近興建一個共有394伙嘅員工宿舍，據聞個項目會同當地發展商合作投入1.2億美元。
位於門洛帕克（Menlo Park）嘅Facebook總部出咗名可以媲美大學校園，今次建設嘅小社區都不遑多讓！名為Anton Menlo嘅小型社區，佔地面積達63萬平方呎，上至健身中心，下至寵物護理店都一應俱全，預計可以容納大約一成員工居住。而宿舍嘅環境將會照足Facebook總部嘅氛圍建構，以凝聚員工同方便佢哋構思新Ideas咁話，租金方面將會跟隨市場而訂。
不過，Facebook發言人話，員工唔願走唔係佢哋起宿舍嘅主要原因，而係回饋員工，有Facebook員工認為，宿舍最正嘅係方便返工，距離公司只有五分鐘嘅單車車程！
近年美國硅谷同三藩市嘅房價飆升，單係去年第四季三藩市灣區嘅房價經已上升24%，有員工反映好難喺公司附近搵樓住，今次Facebook話興建宿舍簡直係為員工雪中送炭！